Hiar jurip u DGP ïa ka Mawlai: ong ba dei ki nongshong shnong ba ieid ïa ka shong suk shong saiñ

Shillong, Naitung 20: U Director of General of Police (DGP), jong ka jylla, u Dr LR Bishnoi ha ka sngi Balang u la hiar da lade ban jurip ïa ki bynta ka shnong Mawlai, kum shibynta ban pynïajan ïa ka jingïadei hapdeng ki pulit bad ki paidbah nongshong shnong ha ryngkat ka jingsynran lang jong ki dkhot ka Dorbar Shnong.
U DGP ha ka jinghiar leit jurip ïa ka shnong u la ïathuh ba kat kum ka jingïathuh ki nongshhong shnong u la ong ba ka jingeh kaba kongsan kaba kynrei ha ki katto katne ki bynta ka Mawlai ka dei na ka jingjyllei u drok. Na ka liang jong u DGP u la pan ka jingïatreilang na ki Rangbah Shnong, ki Dorbar Shnong khnang bvan lah ban teh lakam ïa ka jingjyllei u drok ha ka shnong.
Ïa kane ka jingleit jurip u DGP ïa ka shnong Mawlai la synran lang da ki heh Pulit kiba kynthup naduh u SP ka East Khasi Hills, Sylvester Nongtnger bad u SP (City) Vivek Syiem da kaba ki ïaid beit da ka kjat ban ïakren ïa ki paidbah nongshong shnong.
U DGP u la sdang ïa kane ka jingjurip na Mawlai Mawroh ter ter sha Mawlai Kynton, Mawlai Phudmuri, Mawlai Nongpdeng and Mawlai Nonglum bad pynkut pat ha Mawlai Mawiong.
Haba kren bad ki lad pathai khubor u DGP u la ïathuh ba ka dei ka kabu ksiar na ka bynta jong u ba un ïoh ban ïakren bad phylliew jingmut bad ki Rangbah Shnong bad ruh ki paid nongshong shnong jong ka Mawlai.
U DGP u la ong ruh ba ka shnong Mawlai ka dei ka shnong kaba shong suk shong saiñ hynrei ka jingeh kaba ki ïakynduh ka dei beit tang na ka daw ka jingsdang kynrei ki nongdie bad nong dih drok.
“Nga la buh ka jingkyrpad ha khmat ki Rangbah Shnong ba kin ïa syllok bad ki samla kiba la kyrni ha u drok bad nga la ai ruh ka jingkular ba lada donkam ban ai ïa kino kino ki jingïaid pahara na ka liang ka tnad kan ai ïa kata” ong u DGP
U DGP u la ïathuh ruh ba ka tnad ka la thaw ïa ka Anti Narcotic Task Force (ANTF) la kham slem ban teh lakam ïa ka jingkynrei u drok ha ka ki distrik bapher bapher
Haba la kylli pat halor ka jingleit ïa kynduh ka Seng Samla Mawlai Pyllun hiar u Myntri ki Kam Poh Ïing ban dawa ban thung da ka ANTF kaba pura ha Mawlai u DGP u la pynpaw ba “ka long kaba shong nia bad kam don jingeh ruh ba ka tnad pulit kam don jingeh ban leh kumta lada ka shnong ka lap ba donkam ban leh kumta”
“Ngin sa pynlong ïa ka jngai training ïa ki pulit ha kane ka kam ba kin sngewthuh jylliew ïa ki kyndon jong ka NDPS bad kumno ban pyntreikam ïa ki” ong u DGP.
U DGP u la ong “Lada kano kano ka jingbym ïa sngewthuh jingmut ka don hapdeng ki pulit bad ki nongshong shnong ka dei da kaba kum kane ka jingwan jngoh ba lah ban tehsong bad wat ban rat dyngpong ïa ki kam sniew ruh “
“Ngi kwah ba ki nongshong shnong kin ïa don bynta lang bad ki pulit ha ka ban rat dyngkhong ïa ki kam sniew namar ka jingdon ki pulit ka dei ban ïarap ïa ki nongshong shnong ym ban pynwit eiei ïa ki”
U DGP u la pynpaw ruh ba shen un sa leit ban jurip ïa kiwei pat ki shnong ha ki sngi ki ban sa wan.