Shillong Jylliew, 30: U Director General of Police (DGP) ka Jylla u Dr. L.R Bishnoi ha ka janmiet sngi Palei u la hiar jurip ïa ka jaka ba la jia ka jingshah shoh pynmynsaw jong ki arngut ki samla pule na Kerela ha Jaïaw ha ka 24 tarik mynta u bnai.
Ïa u Dr. Bishnoi la synran lang da u Superintendent of Police (City) u Bah Vivek Syiem, u Superintendent of Police (Traffic) u Shailendra Bamaniya bad kiwei kiwei ki heh Pulit.
U DGP bad ki heh Pulit ki la sdang ïa ka jingjurip da kaba ïaidkjat naduh na Khyndailad bad ïai ter ter sha Lad Umsohsun bad leit rung ha Them Metor ha kaba ki la ïakren bad ki bar jylla kiba sah ha kane ka jaka.
Na Them Metor u DGP bad ka kynhun ki la jurip ïa ki jaka ha Motphran, ha Mission Coumpound bad ha Jaïaw bad nangne ki la ïaid kjat sa sha Mawkhar ban leit phai biang sha Khyndailad.
Kane ka jinghiar jurip jong u DGP ka la long hadien ka jingïakynduh bad ki lad pathai khubor kaba la long ha ophis treikam jong u.
“Ka jingwan jurip jong nga, ka dei da ka jingthmu ban ïakren bad ki nongshong shnong khnang ban sngewthuh ïa ka jingeh jong ki bad ban khmih bniah ïa ka jinglong jingman ha kaba ïadei bad ki bor pahara. Lada i donkam, ngin nang pynkhlaiñ ïa ki bor pahara,” ong u Dr LR Bishnoi haba ïakren bad u nongthoh khubor.
U la ïathuh ba u la ïakren bad ki riewpaidbah kiba shong dukan bad kiba shong basah ha Jaïaw ha kaba ki la pynpaw ïa ka jingsngewtynnad ïa ka jingdon jong ki bor pahara khnang ba ki riewshimkabu kin ym ïohlad ban thaw ïa kino kino ki jingklumar hapoh ka shnong ka thaw.
U Dr. Bishnoi u la ong ba kane ka jingjurip jong u kam dei eh tang ha kaba ïadei bad ka shongsuk shongsaiñ hynrei ka dei namarba u la ïohpdiang ruh ïa ka jingujor na ki paidbah halor ka jingjur shaba palat ka jingdon jong ki nongdih bad nongkhaii drok bad ïa ka jingdonkam ban wanrah ïa ka jingshngaiñ ha ki shnong ki thaw.
Haba kylli, u DGP u la ïathuh ba un sa lum ïa ka jingïalang bad ki Rangbah Shnong ban sngewthuh ïa ka jingeh kaba ki ïakynduh khnang ban ïoh ïa ka jingïatreilang bad ki bor pynïaid shnong.
“Nga kyntu ïa ki samla ba ki dei ban pynleit jingmut ïalade ha ka pule puthi ym ban ïadonkti ha kino kino ki kam be-aiñ bad lada ki mad ïa kino kino ki jingeh ki dei ban leit ïakynduh ïa ki heh Pulit ne ïa ki bor kiba dei khmih bad ngin sa pyrshang katba lah ban ai jingïarap ïa ki,” ong u DGP.
