Shillong, Naitung, 02: Ki heh ophisar na Delhi ha ka sngi Balang mynta ka taïew ki la hiar jurip ïa ki jingtwa khyndew bad ïa ki jingjulor kaba la wanrah ïa ka jingduhnong kaba khraw ïa ki paidbah ha ka shnong Mawlat, ka shnong kaba hap hapoh ka Mawkynrew Community and Rural Development Block.
Ha kane ka jingjurip, ki ophisar ba la phah kyrpang da ka Ministry of Home Affairs, ka Sorkar India sha kane ka jylla Meghalaya, ki la leit jurip ïa ka jingtwa jong u lum uba don ka jaka rep bad ka jingjulor jong ka surok PMGSY ha ka shnong Wahlakhiat kaba la jia ha ka 14 tarik, Jylliew na ka jingther jong u lapbah uba jur ha kylleng ka jylla baroh kawei.
Ha kane ka jingther jong u lapbah uba jur, ka bri rep tympew bad ka bri rep synsar ki dei kiba la shah ktah haduh katta katta bad kynthup ruh ki iing sah jong ki briew.
U Chairman jong ka Synjuk ki Rangbah Shnong Mawlat Area (SRSMA) u la ai khublei kyrpang ïa u MLA u Bah Banteidor Lyngdoh uba la shimkhia ïa kane ka jingeh jong ki paidbah da kaba phah mardor ïa ki tnat treikam jong ka Sorkar ban jurip ïa ki jingshah pynjulor ha kane ka shnong kaba la jia na ka jingwan lynshop jong ki bor ka mariang.
Ha kane ka jingjurip, la sakhi lang da u ophisar na Delhi, ki Engineer jong ka PMGSY, Shillong kiba kynthup ïa u Bah P Hynniewta, u Bah K. Pyrbot bad u Bah K. Pariat, ki ophisar na ka National Highway Byepass Division, u SDO u Bah J. Nongsiej, u Junor Engineer u Bah K. Jyrwa, u Superintendent Engineer ka Eastern Circle u Bah S. Kyndiah bad kiwei kiwei.
