Hiar jurip ki MLA ka TMC sha ki Shnong Khappud Ri Bhoi halor ki jingeh ki paidbah

Nongpoh, Lber 29: Katba ki myntri rangbah ka jylla Assam bad ka jylla Meghalaya, u Himanta Biswas Sharma bad u Conrad K. Sangma mynta ka sngi ki la leit ban ïa kynduh ïa u Union Home Minister, u Amit Shah ban shim ïa ka rai ba khatduh ba pynbeit ïa u pud u sam hapdeng ka Meghalaya bad ka Assam, ki 2 ngut ki MLA ka TMC mynta ka sngi ki la hiar sha ki shnong khappud ha Ri Bhoi na ka bynta ban ïa kynduh bad ban sngap ïa ka sur ki paidbah kiba la pynpaw halor ka jingbym hun ïa ki kam pynbeit pud ka Assam bad Meghalaya ha ka kyndan jong ki Myntri Rangbah.
U Zenith Sangma bad u Winnerson D. Sangma, ki MLA ka party TMC na Meghalaya mynta ka sngi ki la hiar ban leit jurip haduh 4 tylli ki shnong khappud ba kynthup ïa ka Shnong Mawiong, Maikhuli, Iongkhuli bad ka Shnong Barapthar kiba dei ki shnong khappud ka Meghalaya bad kaba dei ruh hadien ba ki paidbah nong shong shnong kim hun satia ïa kane ka kam pynbeit pud ba bun ki jaka jong ka Meghalaya ki la leit noh sha ka jylla Assam.
Haba leit ban jurip ïa kitei ki shnong la don lang bad la sakhi ruh naduh ki nongïalam Shnong, ki paidbah nongshong shnong bad ruh ki dkhot nongïalam ka Garo Students Union na ka Ri Bhoi Zone.
Shuwa ban leit jurip ïa kitei ki shnong ba shah ktah ha kane ka jingpynbeit pud, na ka liang kine ki MLA ka TMC ki la pynlong shuwa ïa ka jingïalang ha ka Shnong Maikhuli ban ïa kren bad ban ïa phylliew jingmut halor ka jingeh ki paidbah kiba shah ktah na ka kam pynbeit pud ka Assam bad ka Meghalaya ha kata ka kyrdan Chief Minister bad mynta ka sngi ruh ki la leit sha Nongbah Delhi ban ïa kynduh ïa u Union Home Minister na ka bynta ban shim ïa ka rai kaba khatduh halor kane ka kam pynbeit pud pynbeit sam.
Haba kren ha kane ka sngi, u Zenith Sangma, u la ong ba ka daw kaba la pynlong ïa ki kum ki MLA ka TMC ban leit jurip ïa kitei ki shnoing, ka dei hadien ba ki paidbah katei ka thain ki la ud la nam bad ki la pan ka jingnïarap halor ka jingshah pynthud ïa ki briew jong ka Assam bad kumjuh ruh ka jingeh halor ki kam pynbeit pud pynbeit sam ka Meghalaya bad ka Assam.
“ka Lynti ïaid kjat ba la tei na ka skhim MGNREGS da ka sorkar jylla bad ka Assam government ka wan ban pynpra jubor bad kane ka paw shai ba ka tlot ka sorkar Meghalya” ong u Zenith Sangma bad bynrap ruh bad kum ki paidbah ruh ki la pynpaw ïa kata ka jingeh ba ki mad jingeh halor kane ka kam pynbeit pud ha kaba bun na ki paidbah ki la pyrshah bad ka sorkar Meghalaya pat ka la shu leh da ka bor khlem ka jingsngew ïa ka sur ki paidbah kaba la paw shai kumba ki la pynpaw mynta ka snngi ha ka jinghiar jurip ban ïa kynduh ïa ki paidbah” u la bynrap.
Shuh shuh, u la ong ruh kane ka kam pynbeit pud ruh la shul eh khlem ka jingsngap ïa ka sur ki paidbah bad bun ïa ka rai ban ïa pynbeit pud la shim rai na Assam bad ki paidbah ki shnong Meghalaya pat kim tip ei ei bad dei namar kane ka daw kum ki paidbah ki pynpaw ka jingsngewkhia halor kane ka kam pynebit pud pynbeit sam kaba kim hun satia ïa kane ka jingïapynbeit hadpeng ka sorkar Meghalaya bad ka sorkar Assam.
Kawei na ka Longkmie na ka shnong Barapathar kaba dei ka jaid bynriew Khasi ka la ong ba ngi ju kren ïa ka ktien Khasi ha katei ka jaka bad da lei lei kim kwah ban leit sha ka jylla Asssam namar ki kwah hi ban don ha ka jylla Meghalaya ba ki sngew shngain ba ki dei ki jaid bynriew Khasi.
Ha kane ka sngi haba ïa phylliew jingmjut halor kane ka kam pynbeit pud pynbeit sam ba kim hun satia ïa kane ka jingïapynbeit pud, ki paidbah katei ka thain kiba dei na ka jaid bynriew bapher bapher ki la kynnoh ruh ba u Myntri Rangbah ka jylla, u Conrad K. Sangma u la ïalam bakla ruh wat hapoh ka ingdorbar thaw ain ka jylla ba la shim rai ïa ka kam pynbeit pud katkum ka sur u paidbah, hynrei ha ka jingshisha ki paidbah kim tip ei ei satia ha kaba ïa ka rai la shim hi tang hapdeng u Myntri rangbah ka Meghalaya bad ka Assam khlem ka mon jong u paidbah.
La sakhi ruh lyngba jong kane ka sngi naduh ki Khasi (Mawet), Gro, Boro, Nepali, Naga bad kiwei ki jaid byrniew ki la pynpaw ba ki sngew shngain ban don hapoh u pud u sam ka Meghalaya kumba ju long baroh shi katta bad kaei kaba ki sngewkhia wat la ki la pynpaw ka jingpyrshah ban shah pynhap sha ka Assam bad ym shem la don kiba sngap ïa ka sur jongki ba ki shah iehnoh bein bad khlem da don mano mano ba ïarap ïa ki wat lada ki angnud ban don ha ka jylla Meghalaya.