Shillong, Nailar 25; Ka bor synshar District ha ka sngi Palei ka la hiar jurip da lade ban leit sorjamin ïa ki jaka ban shah ba ki nongdie madan kin shong die jingdie bad ban weng ne kham pynrit ha ka jaka ba ki ju shong die jingdie ban kham pynkylluid ïa ka lynti ïaid kjat kum shibynta ban pyntreikam ïa ka hukum ka iing bishar ba ka sorkar kan peit ïa ka bha ka miat jong ki nongdie madan da kaba ka pyntreikam ïa ka aiñ ka sorkar pdeng.
Ha kane ka sngi na ka liang ki majistor ki la bthah ïa ki katto katne ki dukan ba kin ym tur than sha ki jaka ba ju ïaid kjat bad ba ju ïaid kali namar ym tang ba ka pynkhapngiah ïa ka leit ka wan ki paidbah bad ruh ban ïada ïa ki nongdie madan na kino kino ki jingjia ïoh ba kin shah tynrah ha ki kali.
Na ka liang ki nongdie madan ruh ki la kular ban ai jingïatreilang bad ki bor sorkar khnang ba kan pynsuk ïa ki paidbah bnongleit nongwan bad ba na ka liang jong ki pat ruh kin ïoh kamai na kane ka kam kaba ki ju trei da ki phew phew snem.
Ha kane ka jingleit sorjamin ïa ki jaka ba la shong da ki nogndie madan ha ka thaiñ Khyndailad la ïalam da u Bah F. B. Basan, ADM bad u Bah Toshanbha Marweiñ, Executive Magistrate ryngkat ka jingsynran lang jong ki Pulit, ki nongmihkhmat na ka tnat Pynroi Sor bad na ka Shillong Municipal Board, u Bah Khrawborlang Nongdhar, Junior Engineer na ka ophis u Assistant Director BADO, W. Chyne u Inspector jong ka Legal Metrology bad L. Nongrum, u Labour Inspector, na ka ophis District Labour.
