Nongpoh, Jylliew 24: Ban tip kham bha halor ka jingwan phet rieh ki nongshong shnong na ka jylla Manipur ha ka shnong Pilangkata bad Maikhuli ha Ri Bhoi, kaba ki la wan sah shipor bad kiba haïing hasem na ka daw ka jingïakynad ha ka jylla Manipur, ki nongïalam ka seng HNYM mynta ka sngi ha ka jinglam khmat da u President, u Bah Louis Dohtdong ryngkat kiwei ki nongïalam ki la leit ban ïa kynduh ïa ki nongïalam shnong ka Pilangkata bad Maikhuli ryngkat ki nongïalam jong kitei ki briew na Manipir na ka bynta ban wad jingtip la ki la wan neem da ki lynti ka ain ban lait na kano kano ka huri hura kaba ktah pat ïa ka shongsuk shongsain ki paidbah ha kitei ki shnong khappud ka Meghalaya.
Haba ïalam da u nongïalam ba rangbah katei ka seng, ha kane ka sngi, ki la lah ban leit ïa kynduh ïa u Rangbah Shnong ka Pilangkata, u bah Besterfield Shylla bad ruh ki nongïalam jong ki ar kynhun kata ïa ka HMAR Community bad ka Zomi Welfare Association kiba dei ki kynhun ba wan na Manipur ban rieh thngen shipor ha kitei ki shnong ka jylla Meghalaya na ka daw ka jingdon ka jingïakynad hapoh ka jylla Manipur kaba la ktah ïa ka shongsuk shongsain jong baroh ki paidbah nongshong shnong ha ka jylla Manipur.
Kum ban pynkynmaw, kine ki nongshong shnong na ka jylla Manipur ki la poi ruh ban wan rieh tngen shipor ha kitei ki shnong khappud, ka dei hadien ba la mih ka jingïaumsnam hapdeng ki jaid byrniew Meitei bad ka jaid bynriew Kuki ha ka jylla Manipur, ha kaba ka jingïaleh bad ka jingïasumsnam ka dang bteng haduh kine ki sngi ba bun ki nongshong shnong ki la phet wir kylleng ki jylla na ka bynta ban ioh riehtngen shipor kaba dang jur katei ka jingïakynad jaid bynriew.
Ka seng HNYM ha ka jingïalam u Bah Louis Dohtdong kum u President ba rangbah, ha kane ka sngi ka la ioh ban ïa kynduh naduh u Rangbah shnong ka Pilangkata, ki nongïalam jong kitei ki ar kynhun bad ruh ïa ki bor pulit ka Pilangkata Police Outpost ban wad jingtip halor ka jingwan poi kitei ki nongshong shnong na Manipur kiba la kot haduh 104 ngut kynthup kiba wan rieh tngen ha ka shnong Maikhuli bad Pilangkata.
Haba ïa kren bad ki lad pathai khubor, u Bah Louis Dohtdong kum u nongïalam ka HNYM, u la ong ba ka daw kaba la pynlong ïa ka seng ban leit jurip sha kitei ki shnong halor ka jingwan poi kitei ki briew na Manipur, ka dei halor ka nongrim ba kim kwah ban mih kano kano ka huri hura kaba ktah pat ïa ki paidbah nongshong shnong kitei ki shnong khappud bad kum ka seng kam pyrshah halor ka jingwan poi jongki, hynrei ka seng ka shu kyntu ba ki dei ban ïaid lyngba ki bor shnong bad ki bor pulit khnang ba ka jingwan jongki ha kitei ki shnong kam dei ban long maw jynthud pat ïa ka shongsuk shongsaiñ ki paidbah nongshong shnong kitei ki shnong ha ka jylla Meghalaya.
U la ong ruh ba ka seng ka sngewkmen hadien ba la ioh ba kynduh ïa ki bor shnong bad bor pulit ba kitei kiba wan phet rieh ha kitei ki shnong na ka jylla Manipur kim shym la leh lyndet ïa ki bor pynïaid bad shuwa ba kin wan sah shipor ruh ki la pyntip sha ki bor shnong bad ruh sha ki bor pulit khnang ban nym mih kano kano kaba ktah ïa ka shongsuk shongsain ki paidbah.
“Kim ki para briew ngi donkam ban don kata ka mynsiem ban ïa pyrkhat lang haba don ha kano kano ka eh ka shon kumba la jia ha Manipur, hynrei kam shym mut pat ba kin shu shim kabu bad shuwa ba kin wan ban pan jaka ban riehtngen ki dei ban pan jingbit shuwa na ki bor shnong bad ruh na ki bor ka aiñ” ong u Bah Louis Dohtdong.
Shuh shuh, u la kyrpad ruh naduh ki bor shnong, ki bor pulit bad kitei ki jaid bynriew kiba wan shong wan sah shipor ha kitei ki shnong ki dei ban don ka jingïatrei katba ki dang sah ha kitei ki shnong, namar kum ka seng kam kwah ban mih pat kino kino ki kynrum ki kynram kiba ktah pat ïa ka shongsuk shongsain ki paidbah jong kitei ki shnong ha ka jylla Meghalaya na ka jingwan poi kitei ki jaid bynriew na Manipur, u la bynrap.
