Hiar jurip ka FKJGP ban pynioh jaka theh ñiut ki paidbah ka thaiñ Byrnihat, kular u Syiem Raid Marwet ban pynioh jaka

Nongpoh, Nailar 23: Hadien ba u Syiem ka Raid Marwet u la ai ka jingkular ban pynioh ïa ka jaka theh ñiut na ki paidbah hapoh ka Raid Marwet bad kynthup ka thaiñ Byrnihat hi baroh kawei, ka FKJGP North Khasi Hills District Unit ha ka jingïalam u Senior Vice president, u Bah Lumlang Mawnai lem bad ki nongïalam ka FKJGP Byrnihat bad Baridua Circle mynta ka sngi ki la hiar ban leit jurip ïa ka jaka ba thmu ban pynlong kum ka jaka theh ñiut paidbah (Dumping Ground) ba ki paidbah ka thaiñ Byrnihat bad hapoh ka Raid Marwet hi baroh kawei ki la donka ban wan rah ïa ka khuid ka suba
Kum ban pynpaw paidbah, ka seng FKJGP ka la shim khia halor kane ka bynta ka dei halor ka nongrim ba ki paidbah ki la donkam ïa kata ka jaka theh ñiut ban lait na ka jingbret pathar ïa ki jaboh ha ki jaka paidbah bad ka seng FKJGP ka la shim khia ruh ba ïa kren bad u Syiem ka Raid Marwet ka dei namar ba kane ka jaka theh ñiut kan ai jingmyntoi lut ïa baroh ki shnong ba hap ha ka thaiñ Byrnihat bad kumjuh ruh kiwei ki shnong naduh na Byrnihat sha Khanapara, ka thaiñ Killing, Umtyrnga bad Pilangkata, ha kaba haduh mynta kim pat don kata ka jaka theh ñiut kaba paka ban lait na ka jingbret pathar ïa ki jaboh bad kumjuh ruh kaba long ka jingma na ka bynta ka koit ka khiah ki paidbah na ka daw ka jingbret pathar ïa ki jaboh.
Halor kane ka jingthmu ban pynioh jaka ban pynlong kum kata ka jaka theh ñiut paidbah ha ka thain Byrnihat, ka Seng FKJGP mynta ka sngi ryngkat u Syiem ka Raid Marwet ki la leit ban jurip ïa kawei ka jaka ha Tamulkuchi ba hap ha ka Raid Marwet bad la shem ba katei ka jaka kam long kaba biang ban pynlong ïa ka jaka theh ñiut namar ka jingdon ki jaka rep, ka wah duid kaba lah ba ktah pynban ïa ka mariang.
Haba ïa kren bad ki Lad Pathai Khubor, U Senior Vice President ka FKJGP, North Khasi Hills District Unit, u Bah Lumlang Mawnai, u la ong ba ka daw kaba la pynlong ïa ka seng ban shim khia halor kane ka bynta ban pynioh jaka ïa ki padbah na ka bynta ka jaka ban theh ñiut, ka dei namar ba kane ka la ktah shisha ïa ka khuid ka suba bad ka koit ka khiah ki paidbah ba bun ki jaboh la shu bret klumar ha ki jaka paidbah khamtam ha ka surokbah naduh na Byrnihat sha Khanapara.
“Ngi la shim khia ban pynioh ïa kane ka jaka theh ñiut ki paidbah, ka dei ruh hadien ba u Syiem ka Raid Marwet u la kular ban ai ïa ka jaka theh ñiut ha ki jaka Raid bad kum u Syiem ruh u la kloi ban ïa trei lang bad ka seng na ka bynta ka jingmyntoi ki paidbah” ong u Bah Lumlang Mawnai, bad bynrap ruh ka seng wat la ha kane ka kynti kam pat ioh ïa kata ka jaka kaba la biang pura ban pynlong ïa kata ka jaka theh ñiut bad ka kyrmen skhem pat kumba la kular u Syiem ka Raid Marwet kin sa ioh ïa ka jaka kaba biang kaba long ka jingmyntoi hi na ka bynta ki paidbah nongshong shnong katei ka thaiñ hi baroh kawei” u la bynrap.
Na ka liang u Syiem ka Raid Marwet, u Paiem Ken Syiem ruh haba kren ha kane ka sngi bad ki Nongthoh Khubor, u la pynpaw ka jingkmen halor kane ka jingiohi jngai ka seng FKJGP ban don noh kata ka jaka theh ñiut paidbah, namar kumba long haduh mynta kam pat don kata ka jaka theh ñiut kaba paka ha kaba ïa ki jaboh la shu bret pathar sha ki jaka paidbah.
Dei halor kane ka nongrim kum u Syiem ruh u kloi ban ai ka jingïatrei lang na ka bynta ban pynioh ïa kane ka jaka theh ñiut paidbah bad wat la mynta ka sngi katei ka jaka kaba la leit ban jurip kam pat biang pura u la kular pat ban ai da kawei ka jaka kaba kham biang ba shen ka seng FKJGP nyngkat u Syiem kin sa leit ban jurip khnang ban lah ban pynioh ïa kane ka jaka theh ñiut na ka bynta ki shnong ba hap ha ka Raid Marwet bad ka thaiñ Byrnihat hi baroh kawei, la bynrap Syiem ka Raid Marwet, u Paiem Ken Syiem.