Shillong, Ïaïong, 19: Ka Deputy Commissioner jong ka East Khasi Hills District ka Kong Isawanda Laloo ha ka sngi Saitjaiñ ka 16 tarik mynta u bnai ka la hiar jurip sha ka shnong Kongthong, ka shnong kaba la bna nam ha baroh kawei ka ri India ïa ka jingrwai ïawbei.
Ha kane ka jingleit jurip jong ka Kong Laloo ba la synran lang da u Sub-Divisional Officer (SDO) ka Sohra Civil Sub-Division, la ïadonlang ki Ophisar na ka Khatarshnong-Laitkroh C&RD Block, Supply, Forest, SSA, Agriculture, Horticulture, ICDS, Health, PHE, PWD, Veterinary, Labour, Cooperative Society, DRDA bad kiwei kiwei ban ïathir ïatai halor ki kam pynroi hapoh kane ka shnong bad ki shong kiba marjan kiba dang hap hapoh ka Khatarshnong-Laitkroh C&RD Block.
Ha ka jingïalang ba la pynlong ba ki nongïalam shnong, ka Kong Laloo ka la pynbna ba shen yn sa pynlong ïa ka Mega Camp ban ïarap ïa ki paidbah nongshong shnong ban ïoh shibun ki lad kiba ka Sorkar ka ju ai jingïarap sha ki shnong bapher bapher naduh kaba plie ïa ki Bank Account, ban shondur Aadhar, ka Koit ka Khiah bad ban ïoh ruh ïa ki skhim jingïarap bapher bapher.
Na ka liang jong kine ki tnat treikam bapher bapher ka Sorkar ki la kular ban leh katba lah ban wanrah ïa ki song pynroi haph kane ka shnong ka la pawnam bha ha ki kam jngohkai pyrthei.
U MP ka Rajya Sabha u Prof. Rakesh Sinha uba la shimti ban peit ïa ka bha ka miat ha kane ka shnong u la ai bun ki lad jingïarap ha kane ka shnong kum ka jingïarap.
