Hiar hi u SSP Ri-Bhoi bajur kiba ñiah kali bad u bilor kyiad, 8 lak ïoh daiñ kuna ki Pulit

Nongpoh, Risaw 08: Hadien bun ki jingjia aksiden bad ki jingjia ba sngewsih ba la jia ha surok bah National Highway kaba la wanrah ruh ka jingduh ki mynsiem briew tang namar ka jingthurmur haba ñiah kali ryngkat ka dih buaid, u Senior Superintendent of Police ka Ri-Bhoi u VS Rathore hynnin ka miet u la hiar hi dalade sha surok ryngkat ki pulit ophisar bad ki langrut ban talasi naphang ïa ki kali kiba ïaid ha shilynter jong u surok National Highway 6 ha Nongpoh.
Ïa kane ka jingtalasi ba la lamkhmat hi da u SSP, ha ka jingdonlang u Bah Orville Massar Additional SP bad ki pulit ka tnad Traffic jong ka Nongpoh Branch, la sdang naduh ka por 7 baje janmiet ha kaba naduh ka jingsdang talasi la lap shibun ki nongpynkheiñ aiñ naduh kiba dih buaid bad ka ñiah kali, kiba tah iit iong, kiba pyndait ïa ki light thaba ne LED bad kiwei kiwei, dei hadien ka jingmaham na ka por sha ka por ki pulit kim banse ban daiñ kuna ïa kitei ki nongpynkheiñ aiñ.
Ki pulit ki la tar naphang ruh ïa ki kali tah iit iong, bad phaw law mardor ïa kiba pyndait LED light bad kane ka jingtalasi ka long salonsar lut naduh ki kali heh haduh ki kali rit bad wat ki ar sha ka ban shngaiñ ka leit ka wan bad ka jingim jong ki paidbah kan nym don ha ka jingma.
Shuh shuh ha katei ka jingtalasi kam dei tang ha Nongpoh, hynrei la leh ruh ha kiwei kiwei ki bynta jong ka Ri Bhoi kum ha ka thaiñ Umsning, Umiam bad tang ka Nongpoh ka jingdaiñ kuna na ki kali pynkheiñ aiñ ka la poi kumba T5,28,500/- bad haba kheiñ kyllum ha baroh kawei ka district ka jingdaiñ kuna ka poi kumba 8 lakh tang hynnin ka miet.
Haba kren sha ki lad pathai khubor u Senior Superintendent of Police ka Ri-Bhoi u VS Rathore u la ong ba kane ka jingtalasi ka long kum ka jinghikai ïa ki paidbah ban nym dei ban kheiñ sting bad ban duh buaid ha ka por ba ñiah kali namar kane kam buh jingma tang ïa uto u nongdih, hynrei ïa kiwei pat kiba leit ba wan da ka lynti kum ka jingjia dang shen kaba la jia ha Thadrang bad ha Umsaw Nongkharai ha Ri-Bhoi District haduh 4 ngut ki heprit ki la duh noh ïala ka jingim bad 2 ngut ki nongñiah kali na Garo Hills ki la khlad hajuh.
U la ong ruh kiba bun hi ki jingjia aksiden kiba ju jia na ka por sha ka por, ka dei hi na ka jingthurmur u nongñiah, ki don ki buaid, kiba samthiah, kiba pynher sted bad kumta ter ter bad kum ki pulit ki ju leh ïa ka jingtalasi hynrei hynnin ka miet kum u heh pulit u la mih hi sha surok ryngkat ki ophisar ban peit pyrman ïa ki kali ba ïaid ba ïeng ha surok bah ban long ruh kum ka jinghikai ba ki paidbah kim dei ban kheiñ sting ïala ka jingim bad ka jingim jong kiwei kumjuh.