Hiar hi u CM bad Dy. CM ban plie ïa ka CHC bad Transit Home ha Mawryngkneng

Shillong, Nailur 07 : U Myntri Rangbah ka Jylla Conrad K Sangma ryngkat u Symbud Myntri Rangbah Bah Prestone Tynsong ha ka sngi Balang ki la hiar sha Mawryngkneng ban plie ïa ka Community Health Centre (CHC) kaba la tei thymmai bad ruh ïa ka Transit Home na bynta ki longkmie ba wan kha khunlung.
Mynta katei ka CHC ba thymmai ka la lah mynta ban pdiang haduh 60ngut ki nongpang na ka 30ngut ba ki ju pdiang baroh shi katta ha ka PHC. Katei ka Transit Home pat kadei kaba la buh kyrpang na ka bynta ki longkmie ba armet kiba dei na ki shnong ba kham jngai kiba hap ban wan sah lypa.
U Myntri Rangbah haba kren ha ka jingïalang u la ong ba dei lyngba ka jingbuddien jong u MLA ka thaiñ ryngkat ki nongïalam shnong ba katei ka CHC ka la urlong.
Haba kren pat halor ka Transit Home, u Conrad u la ong ba ki la ïohi ba shwa u 2018 ki don bun ki longkmie kiba duhei ïa la ka jong ka jingim ha ka por ba kha khun bad hadien ba la wad ïa ka daw ki shem ba ka jingbym biang ki jaka sumar, nangta ka jingsumar bad ka jingbym leit sha ki jaka sumar ki dei katto katne ki daw ba kongsan.
“Kine ki shelter home kin ai ruh ka jaka sam, ka bam bad ka jingsumar khnang ba kin lah pat ban kha suk ynda la dei ka por. Haduh mynta ngi don haduh 180 tylli ki Transit Home ha baroh kawei ka jylla ban ai ka jingshakri kaba paka na ka bynta ki longkmie ba don jingshitom bad na ka bynta kito kiba sah jngai na ki jaka sumar.”
Kawei pat kaba u Myntri Rangbah u pyntip ha katei ka sngi ka long ba ka sorkar ka la pyntreikam da ka projek MOTHER kaba dei ka rukom treikam ban peit ym tang ïa ka koit ka khiah ki longkmie ba armet hynrei wat ïa ka koit ka khiah jong ki, ka pule puthi bad ruh ban pynkupbor ïa ki longkmie ha nongkyndong.
Ha kane kajuh ka sngi u Myntri Rangbah u la shim bynta ruh ha ka SHG Mela kaba la wan ban shim bynta lang da ki hajar ngut ki dkhot jong ki SHG. Katkum ka jingong jong u mynta ka jylla ka la don haduh 42,000 tylli ki SHG lane kumba 4lak tam ki dkhot kiba don ha ka.
“Kane baroh ka urlong namar ka jingtrei shitom ki bor sorkar, ki CEO MSRLS bad COO ba ka la kiew stet na ka 4000 tylli ha ki snem 2017-18 sha ka 45000 tylli ha ka jylla” u la ong. U ïathuh ruh ba wat u Myntri Kampohiing ka Ri ruh u la ai ka jingïaroh halor ka jingkiew ka jingdon ki SHG ha ka jylla.
U pyntip ruh ba kin sa thaw ruh da ka App ha ki mobile na bynta ki SHG kumjuh ruh na bynta ki Farmers Producer Group bad ruh na bynta ki samla
“Kumta na ka sorkar tang lyngba uwei u budam lah ban phah ïa ki jingtip sha baroh kiba don ha katei ka App.”
Haba jubab pat halor ka dorkhas, u Myntri u la kular ruh ban phah pynbha noh ïa ka madan Mawmang kaba ki long jingïalang ha katei ka sngi, nangba ban ïarap kyrpang ïa ka Mawryngkneng College bad haba ïadei pat bad ka Multi-facitility Centre kin dang ap ïa ka jingmang pisa na ka sorkar pdeng.
Hadien kane u Conrad u la sam ruh ïa ki jingïarap pisa sha ki Village Orgnisation kumjuh ruh sha ki SHG bapher bapher.
Kiwei pat kiba kren ha kane ka sngi ki kynthup naduh u Symbud Myntri Rangbah, u MLA ka thain bad kiwei kiwei.