Hiar bad SP, DC bad DTO sha surok ban talasi kali, lada ñiah Auto ne Mercedes ka aiñ ka dei kumjuh
Nongpoh, Risaw, 09: Haka jingpeitngor kaba kham tyngeh ki pulit ka Ri-Bhoi hapoh ka jingïalam u Senior Superintendent of Police u VS Rathore, ryngkat u Deputy Commissioner ka Ri-Bhoi u Abhilash Baranwal lem bad u Bah A Kharmon District Transport Officer, mynta ka janmiet kila hiar madan biang sha surok bah ha Nongpoh ban talasi naphang ïaki kali pynkheiñ aiñ naduh ki 2 shaka haduh ki kali heh kum ka jingbym phong ïaki helmet ki seatbelt, ki bym pynbiang ïaki kot ki sla kali, kiba ñiah naka jaka bym dei, kiba pynsted palat pud, kiba ñiah kali bad u bilor kyiad, kiba pyndait ïaki iit iong bad kiwei kiwei ki tiar ba long beaiñ bad kiwei kiwei.
Ïa kane ka jingtalasi la pynlong ha baroh kawei ka district naduh Umiam, Khapmara, Umsning, Nongpoh, Byrnihat namar ka jinglehmon palat jong ki paidbah bad ban pynthikna ïaki paidbah haba ki mih sha surok ki dei ban bud katkum ki kyndon bad kane ka long kum ka jinghikai ïaki paidbah ba ki dei ban burom ïaki aiñ ñiah kali ban lait na kano kano ka jingjia ba sngewsih.
Ha kane ka sngi naka liang ki ophisar kiba don haka kam kila deng ruh da ki camera haka shadem jong ki bad tad haduh ban da pynmih ïa kane ka khubor ka jingtalasi ka dang ïaid shakhmat.
Na ka liang u DC ka Ri-Bhoi u la ong ba naka liang jong u kum u DC u la snohkti lang ha katei ka jingtalasi bala sdang da ki pulitka Ri-Bhoi ryngkat ka thong ban nym buh ïaki mynsiem briew haka jingma bad ka jingsngewsih bad lyngba kane ka sienjam bala shim da ki pulit ka jingpynkheiñ aiñ kala sdang ban duna bad ki briew kila sdang ban bud ryntih ïaki kyndon.
U VS Rathore u Senior Superintendent of Police ka Ri-Bhoi u la ong ba bun naki paidbah kila kyrpad sha ki pulit ba ka jingtalasi kam dei ban long tang shi sngi hynrei ka dei ban bteng naka por shaka por kumta ki pulit mynta ka miet kila mih biang sha surok haka jingdonlang ki magistrate bad DTO.
U la phah ruh ka khubor sha baroh ki paidbah, la ki dei ki nongñiah kali kiba tad ne kiba remdor, ym don ba kham khraw ban ïaka aiñ bad ka aiñ kan treikam salonsar lut ïa baroh ha kaba u la kyrpad ïaki paidbah ba kim dei ban pynkheiñ aiñ namar ka jingim ka kham kordor ban ïa kiei kiei.