Shillong, Nohprah, 21: Ki paidbah ki dang ïai bteng ban ïohi ïa ki Bayraktar TB2 Unmanned Aerial Vehicles (UAV) ba la pynher da ka ri Bangladesh ha shilynter ka khappud Indo-Bangla ha Meghalaya, kaba u pud u sam u don ka jingïasnoh kaba jrong 443 kilomitar bad ka ri bamarjan.
Dang shen ki paidbah na ka thaiñ Mawkyrwat, South West Khasi Hills ki la ïohi ïa kine kijuh ki UAV ba la pynher da ka ri Bangladesh.
Haba pynthikna ïa kane, uwei u heh Pulit u la ong ym tang ki paidbah na ka shnong Mawkyrwat, Shella bad Sohra hynrei na kiwei kiwei ki bynta jong ka jylla kum ka Dalu, Mahendraganj, Rongara (ha rilum Garo) ki la ïohi ïa ki jingthaba jong ki jingshai (hateng hateng da ka rong jyrngam bad rong saw) kiba her ha sahit bneng.
Katkum ka jingong jong u, kine ki UAV ki her shajrong bha ha sahit bneng bad ka long kaba eh ban ïohi da ki khmat briew bad namar kata ym lah satia ban ai ïa ka jingtip ba thikna ha kano ka dur kine ki UAV ki long.
Ki paidbah nongshong shnong ha khappud ki la ithuh ruh ba kine ki suba Drone ki her tang khyndiat minit bad hadien kane ki shu jah rngai ha sahit bneng.
Ha kajuh ka por, ka Sorkar Jylla ka ladep pyntip ïa kane ka jingjia sha ki tyndong skhor jong ka Sorkar Pdeng.
U Symbud Myntri Rangbah ka Jylla uba khmih ïa ka tnat Kam Pohing Bah Prestone Tynsong ha ka 16 tarik mynta u bnai u la ïathuh ba ka Sorkar Pdeng bad ka Sorkar Jylla ki la peitngor bha ïa ka jinglong jingman hadien ba la ïohi dang shen ïa ki Bangladeshi Bayraktar TB2 Unmanned Aerial Vehicle (UAV) ha shilynter ka khappud Indo-Bangla ha Meghalaya.
Ïa kine ki UAV la ïohi kyndiang hajan Sohra bad Shella ha East Khasi Hills District ha ka jingjngai kaba 200 mitar shathie na u Zero Line ha khappud.
U Bah Tynsong u la ong, “ngi (Sorkar Jylla) la pyntip sha ka Sorkar India (halor kane ka jingjia) bad ka Sorkar India ruh ka la shimkhia bha halor kane. Ha kajuh ka por, kum ka Sorkar Jylla, ngi la leh ruh la ka jong ka kamram.”
“Yn hap leh beit da ka kam. Kumba nga ong, ka sorkar Jylla bad ka Sorkar Pdeng ki la peitngor bha. Wat khuslai,” la kular u Myntri ka tnat Kam Pohïing.
U Symbud Myntri Rangbah u la bynrap ruh da kaba ong, ‘ka dei ka kamram jong ka Sorkar Pdeng ban ïakren bad ka Sorkar Bangladesh ïa kane ka kam.”
