Heh mynsiem lut ki nongïalam TMC ba wan ka Mamata Banerjee shwa ka elekshon
Mynta yn poi ka hehduh ka AITC ha Shillong
Shillong, Nohprah 11 : Ka nongïalam ba hehduh jong ka All India Trinamool Congress (AITC) kan poi mynta ka janmiet sngi Nyngkong ha Nongbah Shillong ha ka jingwan ba arsngi jong ka sha Meghalaya ha ka sien kaba nyngkong eh.
Halor kane, na ka liang ki nongïalam ka party ki la pynpaw ba ki sngew heh mynsiem haduh katta katta hadien ba ki la ïoh jingtip ba ka hehduh jong ka party, ka Mamata Banerjee kan wan ban ïa kynduh markhmat ïa baroh ki nongïalam party ha kane ka jylla ha ka 13tarik mynta u bnai.
Haba kren bad u President ka TMC Meghalaya, Bah Charles Pyngrope u la ïathuh ba kane kadei ka sien kaba nyngkong ba ka hehduh ka party kaba dei ruh ka Myntri Rangbah ka jylla West Bengal kan wan ban kynduh ïa ki nongïalam party naduh ba katei ka party ka ïoh ban bsuh jaka ha kane ka jylla.
Da kaba kubur halor ka jingkylli, u Bah Charles u la ong ba khlem pep ka nongbah Shillong kan shongshit lada ka Mamata ka ïaid kjat kylleng ki jaka kumba ka ju leh ha ka jylla West Bengal. Shuh shuh u la ïathuh ruh ba baroh ki tip ai katei ka heh duh ka party kum ka Myntri Rangbah kaba ïaid beit da ka kjat ban leit jurip lane ban leit jngoh ïa ki paidbah lane ki kam ki jam.
“Baroh shi katta, dei mangi ba pynsngewthuh ïa ki nongïalam ka party shaphang ki mat treikam jong ka party. Hynrei mynta ki nongtrei party kin ïohsngew hi markhmat na ka trai kumno ka lah ban pynliem ïa ka BJP ha ki elekshon,” la bynrap biang u President ka Meghalaya TMC.
La ïathuh ruh ba ha kane ka jingwan, katei ka hehduh kan ïa kynduh ruh ïa ki kynhun seng bapher bapher la ka long naduh ki nongïalam shnong, ki sengbhalang bad bun ki riewshemphang kiba kwah ban kynduh.
Nalorkata, la ïathuh ba ka la buh por ruh ban kynduh ïa ki khunswet bad ban rakhe lehkmen Kristmas bad ki.
Halor ka jingkylli, u Bah Charles u la ïathuh ba katei kam dei eh ka jingwan ban pynkhreh na bynta ka elekshon hynrei kadei shi bynta ban kynduh markhmat ïa ki nongtrei party kiba la jied ban don ha ka TMC da kaba kyntait noh ïa kiwei ki party.