Hato yn sngap jar ki MDC NPP ba kynthoh u CM halor jingbyrngem leit Iing Bishar ka Boundary Committee

Shillong, Ïaiong 28 : Ka jingkren jong u Myntri Rangbah ka Jylla, Conrad K Sangma ha ka sngi Balang ka buh mynta ïa ki MDC jong katei ka party ha ka khim khait kumno ban pynshai khamtam hadien ba u Myntri Rangbah u la kam lypa ba ki MDC jong ka NPP kim don bynta satia ha kaba shim ïa ka rai ban byrngem ujor sha Iing Bishar halor ka soskular pynbeit pud hapdeng ka Meghalaya bad Assam.
Ha katei ka sngi, u Myntri Rangbah u la ong ba ka jingbyrngem ban ujor sha Iing Bishar da ka Boundary Committee jong ka KHADC halor ka soskular pynbeit pud ha ka kylla kaba nyngkong, kadei ka rai shimet jong ki katto katne bad kam don bynta satia bad ka District Council lane na ka party.
Katkum ka jingtip ba la ïohlum, haduh mynta na ka liang ki MDC ka NPP kim pat shim kano kano ka rai la kin pynshai lane kin sngap jar halor katei ka jingkren jong u Myntri Rangbah.
Haba pyrshang ban ïakren bad ki katto ki MDC jong ka NPP ym shym la ïoh satia ban wad jingtip la na ka liang jong ki ruh ki don bynta neem ha katei ka rai ba shim da ka Boundary Committee jong ka KHADC ban ujor sha Iing Bishar haba ïadei bad katei ka soskular pynbeit pud.