D ang shen ka pyrthei baroh kawei ka la sakhi ïa ka jingshah kyndang jong ki nongdie madan ha Khyndai Lad ha ki bor synshar district bad ki nongtrei ka Shillong Municipal Board kiba la pyntreikam ïa ka hukum ba la pynmih da ka Iingbishar High Court. Ka la mih ruh ka jingïapyni nia, ka jingbyrngem pom sdie bad ka jingbyrngem tah sohmynken beb ïa ki nongtrei ka Municipal kiba kurup ïa ki mar ki mata jong ki nongdie madan.
Ka jingpyrkhat jong ka Sorkar ka long kaba dei ban ai jingïaroh namarba kan pynkylluid ïa ka leit ka wan jong ki briew bad ki kali kiba ïaid lyngba na ka surok Khyndai Lad hynrei ka jingkhapngiah ka la long shaba palat liam baroh shikatta ki snem haduh ba ynda ïaid lynti ka lam sha ka jingïatakhuh parabriew.
Ka jingpyrshah jong ka Meghalaya and Greater Shillong Progressive Hawkers and Street Vendors Association (MGSPHSVA) ka long namarba ka Provisional Town Vending Committee (PTVC) kam shym pat ai jingmynjur ïa kane ka jingbuh por khatduh ha ka 22 tarik mynta u bnai da ka sorkar ban pynkynriah lut ïa baroh ki nongdie madan sha ki jaka ba ladep shna kyrpang.
Hynrei watla katta ki nongdie madan ki hap hi khatduh ban pyndem ha ka sorkar namarba kam shym la leh beiñ namarba ka la pynbna ban siew bailutksan ruh 10 hajar marwei ïa ki nongdie madan kiba leit sha ki jaka ba ladep pynshna.
Ka jingtuklar da ka Iingbishar High Court ban pynjari da ka por shong die madan ha Khyndai Lad da kaba phah peit pyrman ha u Special Officer ba ka la thung kyrpang kan ïarap ïa ka Sorkar bad ïa ki bor synshar district ba kin dup lah ban pynkynriah ïa ki nongdie madan suki pa suki khamtam ïa kiba la ïoh ïa ka Certificate of Vending.
Ka jingkylli kaba mih mynta hato ki nongdie madan kin kohnguh neem ïa ka jingpynbna jong ka Sorkar ban pynkynriah lut ha ka 22 tarik Naitung kumba ka la buh por khatduh? Lada kim kohnguh hato kin mad biang ïa ka jingshah pynbor ne kin shah jyrwait skhor ha ka ïingbishar?
Hynrei ka mih pat ka jingkynnoh ba ka Shillong Municipal Board (SMB) ka la leh bym hok ha kaba ïadei bad ka jingsam ïa ki Certificates of Vending (CoV) ka dang ïai bteng haduh mynta. Ka Municipal kum ka tnat treikam jong ka Sorkar ka hap ban ïaid da ka lynti kaba dei khnang ba ka jingthmu jong ka Sorkar kan long kaba jop namar lada ka long kumba la kynnoh kan pynduhnong ïa ki nongdie madan kiba dei hok shisha ban ïoh ïa ki dukan ba la pynkhreh da ka Sorkar.
Ha kaba ïadei bad ka jingong ba ka don ka jingïapher ha ka rukom pynbna ïa ka jingdon jong ki nongdie madan ha kylleng ki bynta jong ka Sor Shillong, ïa kane ka bynta ruh ka Sorkar ka la dei ban khmih bniah sa shisien da kaba ïatreilang bad ka seng ki nongdie madan namarba ka kham tip bha ïa kino ki nongdie madan ba dei hok bad kino kiba shu kwah ban shim kabu bad kiba thap tang ïa ka ïoh ei namar kiba ladep mad ïa ka jingjynjar ki dei ki nongdie madan kiba ju im kamai jakpoh ban pyndap ïa ka iing ka sem hynrei ynda la shna ka sorkar ïa ki dukan ba bha ki don pat ki nongshim kabu kiba lehse ki lah ban rung na kyrpong ban ïoh wat ïa kaba kim dei hok bad kaba long kum ka jingknieh noh ïa ka pliangja jong ki nongdie madan ba dei hok.
Khlempep ka sor Shillong kan sa kylluid ynda la pynkynriah lut ïa ki nongdie madan ha kylleng ka sor namar ka jingdon jong ki nongdie madan wat ha ki lynti ïaid kjat ka buh jingma haduh katta katta ïa ki nongleit nongwan namarba ki briew ki hap ban ïaid na surok ïaid kali ym shuh na ki lynti ïaid kjat nalor ba ka surok ha nongbah Shillong ka long kaba rit sa ka jingieng kali khlem akor jong ki briew ha surok kaba la nang pynrit shuh shuh ïa ka surok bad kaba pynbitar pat ïa ki nongïaid lynti.
