Hato yn nang ïoh thiah u CM lada weng noh ïa ki bor pahara : PN Syiem

Shillong, Naiwieng 25: Ka Seng Congress mynta ka sngi ka la pynlong ïa ka jingïalang sngewlem na ka bynta ki lanot ba shah siat ha Mukroh ha ka 22 tarik mynta u bnai ha kaba la ïoh ïa ka jingkren na ki nongïalam ka Seng bad kumjuh ruh ka jingthang mombati ha phyllaw jong ka Congress Bhavan, Shillong.
U Bah Pynshngaiñ N Syiem, Working President ka Meghalaya Pradesh Congress Committee (MPCC) u la ong ba ka long kaei kaei kaba sngewpangnud ba kiba shah kem kin shah law lyngkhuit bad shah bom shah sympat. Hynrei kaba sngew sangsot eh ka long ka jingshah siat ki nongshongshnong ba lui lui ha ki Pulit Assam.
U la ong ba kane baroh ka jia namar ba ka sorkar Meghalaya kam shym la pynbiang ïa ki bor pahara ha ki Shnong kiba don ha khappud bad ka Assam. “Nga ngeit ba kane ka jia namar ba ym shym la don ki Pulit ban pahara ïa ki jaka khappud jong ngi bad ka Assam”, la ong u CEM barim ka KHADC.
Haba ther tyngeh ïa ka sorkar MDA kaba u Myntri Rangbah bad ki Myntri ki pyrkhat beit tang ïalade shimet, u MDC jong ka Mawkhar-Pynthor umkhrah, u la ong ba wat u Myntri Rangbah, u Conrad Sangma ruh un nym nud ban leit jingleit khlem da don ki Pulit bad ki bor pahara. “Wat ba un thiah tip u nud ne ym nud u Myntri Rangbah, lada weng noh ïa ki bor pahara na ïing jong u”, la ong u Nongïalam ka Liang Pyrshah ha KHADC.
U la ong ba ïalade te ki pynbiang ki bor pahara, katba ïa ki paidbah ki ieh bad ka mat jia ïa ki katba long.
U Bah Syiem, u la ong ruh ba ka jingbym buh ïa ka Police Out Post ha Mukroh ka pyni ïa ka jingtlot bor jong ka sorkar Meghalaya kaba shu pyndem bad shah beit ban leh ka Assam katba mon.
U Bah Marbud, nongïalam ka Youth Congress, u la ong ba haba u la poi ha Mukroh ha katei ka sngi ba jia ka jingshah siat bad haba la wanrah ïa ka met sha ïing, um lah khlem da jaw ummat lang haba u ïong sngew ïa ka jingïam jinglynñiar ki khun kiba dang rit bad ka lok jong u Bah Shiruplang Sumer, uwei na kiba shah siat ha ki Pulit Assam ha katei ka sngi. Nangta u la ong ba ha ka por ba u ïarap rah ïa ka met na kali sha ïing, u la ïoh bat ïa ka bynta jong ka met kaba la jem bad mih snam, kaba dei ka jaka ba u kuli u la rung sha ka met jong u.
U la pynrem jur ruh ïa ka Assam kaba kynnoh beiñ ïa kiba shah siat ba kidei ki nongkhaïi dieng tuh. “Kine kidei tang ki nongrep baduk bad kim dei satia ki nongkhaïi dieng tuh bad lada dei ki nongkhaïi dieng tuh ki la dei ban riewspah, hynrei ka ïing jong ki, kadei kaba shu lape da ka dewbyrtha tang shi kamra”, u la ong.
Ka jingïalang ka la sdang da ka jingduwai i Dr. Kharkongor bad kumjuh ruh ka jingsngap jar ba ar minit. La ïoh jingkren ruh ruh na i Kong Joplin Shylla, President Mahila Pradesh Congress Committee, Bah Ronnie V. Lyngdoh, Vice President MPCC bad la pynïaid ïa ka jingïalang da u Bah Anotnio War, President ka East Khasi District Congress Committee. Hadien kane la pynbud sa ka jingïathang mombati ha phyllaw jong ka ophis.