Shillong, Ïaiong 21: Ka rai ba dang shen jong ka Sorkar Jylla ban siew T. 3 lak kum ka bai lutksan sha ka Longkmie, kaba duh noh ïa i Khunlung hadien ba ka Ganesh Das Hospital ka kyntait ban sumar, kala pynmih ïa ka jingkylli ba hato ka Sorkar kan siew bai lutksan lang halor ka jingïap ki 877 ngut ki Khunlung ba dang kha ha u snem 2020 namar ka jingwan lynshop ka khlam Covid-19.
Halor ka jingai jingmut jong ka Meghalaya Human Rights Commission (MHRC), kaba la shim suo moto case pyrshah ïa ka Ganesh Das Hospital, ka Tnad ka Koit ka Khiah kala pyllait ïa ka song pisa ba T. 3 lak dang shen sha ka Kmie jong i Khunlung ba khlad.
Hynrei, ka jingkylli kala mih ba hato ka Sorkar kan ailang ïa kane ka song pisa sha ki Longïing kiba la shah ktah na ka jingïap palat 877 ngut ki Khunlung ba dang kha bad 61 ngut ki Longkmie ba leit kha khun ha Jylla hapdeng u bnai Ïaiong haduh Naitung 2020.
“Ka rai jong ka Sorkar kala pynkhmih lynti ruh ïa kiba bun balang ba kan ai lem ïa kajuh ka song jingiarap sha kiwei kiwei ki Longkmie kiba la mad ïa kajuh ka jingjia (jingkhlad i Khun ba dang kha)” ong kawei na ki Nongïalam Sengbhalang.
Dang shen, ka National Human Rights Commission kaba la shimkhia ïa ki khubor, kala pan jingpynshai na ka Sorkar Jylla halor ka jingïap ki Longkmie ba kha khun bad ki Khunlung ba dang shu kha ha Jylla.
Ha ka juban, ka Sorkar Jylla kala pyntip ba ki Longkmie ba armet kila kyntait ban leit shah sumar ha ki jaka sumar namar ka jingtieng ïoh ïa ki ïabit ïa ka jingpang Covid-19 bad ka jingtest ïa ka Covid-19, kaba lam sha ka jing ïap haduh 877 ngut ki Khunlung bad 61 ngut ki Longkmie ba dang armet.
“Ka daw jong ka jingïap ki Khunlung ha ka jingwad bniah la shem ba ka dei na ka jingbym ïoh ïa ki jingsumar sukher namar ki Kmie ba armet kila kyntait ban leit shah sumar ha ki jaka sumar na ka jingtieng ïa ka khlam Covid-19” ong ka kaiphod ka sorkar.
Ha ka 25 tarik Lber, ka Ïingkashari Meghalaya High Court haba shong bishar ïa ka PIL halor ak jingïap ki 877 ngut ki Khunlung bad 61 ngut ki Longkmie ba kha Khun ha Jylla ha ka por ba lynshop ka khlam, kala ai jingmut ïa ka Sorkar Jylla ban ai lem ïa ki song jingiarap ïa ki longïing kiba la duh ïa ki mynsiem namar ka jingbym ïoh ïa ki lad jingsumar.
Ka Ïingkashari kala bthah ruh ïa ka Sorkar Jylla ban ai ïa ka kaiphod kaba bniah halor kane kaba kyrshan ruh bad ki jingkheiñ jingdiah baroh.
