Hato yn ïoh shuki myntri I Dr Ampareen hadien ka dorbar Mang Tyngka?
Thung Co Chairman ka sorkar ïa ki 4 ngut ki MLA ka Cong
Shillong, Rymphang 19: Ka Sorkar Meghalaya Democratic Alliance (MDA) hynne ka sngi thohdieng, ka la thung ïa ki 4 ngut ki MLA ka Congress kum ki Chairman ha ki tnad bapher bapher bad ka Sorkar ka la leh ïa kane kum ka jingai sngewbha ba ki wan kyrshan ïa ka Sorkar Jylla. Katba ïa I Dr Ampareen Lyngdoh iba dei i nongïalam ka Congress Legislature Party (CLP) ym pat thung ha kano kano ruh ka shuki bad la ïoh jingtip ba i lah ban rung pynban ha ka kynhun myntri hadien ka Dorbar Mang Tyngka namar i la thikna beit ban pynïasoh sha ka NPP.
Kine ki saw ngut ki MLA ki kynthup ïa u Bah PT Sawkmie, Bah Mohendro Rapsang, Bah Mayralborn Syiem bad Bah Kimfa Marbaniang.
Ïa i Nongïalam ka Congress Legislature Party (CLP) Kong Ampareen Lyngdoh, ka Sorkar kam pat shym la pynbna satia ïa ka jingaikam hynrei la khmih lynti ba in ïoh ïa ka dohkshong namar ka jinglong nongïalam jong ki MLA ka Congress.
Ka tyllong khubor ba la ïoh ka ïathuh ba ka lah ban don ka jingbujli myntri hadien ka Dorbar Mang Tyngka bad ka don ka jingïakren ban pynrung ïa i Kong Ampareen ha ka shuki Myntri Sorkar namar ine i la thikna beit ban ïa aireng na ka NPP ha u 2023 bad sa kawei ruh ym don myntri kynthei ha kane ka kynhun myntri jongka sorkar MDA.
Kat kum ka jingpynbna ba pynmih daka Sorkar, u MLA ka Congress na Mawlai Bah PT Sawkmie bad MLA ka West Shillong Bah Mohendro Rapsang kila shah thung kum ki Co-Chairmen ka Meghalaya New and Renewable Energy Development Agency (MNREDA).
U MLA ka Congress na Nongpoh Bah Mayralborn Syiem ula shah thung kum u Co-Chairman ka Meghalaya Industrial Development Corporation (MIDC) bad MLA ka Rambrai-Jyrngam Bah Kimfa Marbaniang ula shah thung kum u Co-Chairman ka Meghalaya Government Construction Company (MGCC). Ïa kine ki MLA la thung ha ka kyrdan A+category ha ryngkat bad ki jingmyntoi ba ki dei ban ïoh.
Nalor kine ki MLA ka Congress, ka Sorkar kala thung ruh ïa u MLA barim Limison D Sangma bad Billykid A Sangma kum ki Co-Chairmen ka Meghalaya State Planning Board (MSPB) bad ïa u Dr. Raju Azad kum u dkhot ka MSPB.