Ka sem jong ka seng Congress ka la kylla kum ka iingjah hadien ka jingryngkang dieng kper ki san ngut ki MLA ka Congress sha ka National Peoples Party (NPP). Sah sa tang u Saleng Sangma uba long u MP na Tura. Hynrei u nongïalam jong ka Meghalaya Pradesh Congress Committee u Bah Vincent H. Pala u tei pop ïa ka NPP ba ka shu thied da ki san ngut ki MLA ka Congress sbai rupa ba la lum na kaba tih bad khaii beain ïa u dewiong. Hynrei ki nongïalam jong ka NPP ki kyntait war ïa ka jingkynnoh jong u President ka MPCC da kaba kam ba ki saw ngut ki MLA ka Congress ki pynïasoh sha ka NPP namarba ki ïohi ïa ka jingtreikam baradbah jong ka party hapoh kine ki 7 snem tam.
Ka jingtroin jong ka Congress ha Meghalaya kumba ka paw ka la jia naduh ka por ba ki 12 ngut ki MLA hapoh ka jingïalam jong u Dr. Mukul Sangma ki la phet sha ka All India Congress Committee shwa ka elekshon 2023. Ym don ba poi pyrkhat shuh ba ka Congress kan dang jop pat sa san ngut ki MLA ha ka elekshon sha ka Iingdorbar Thawain. Hynrei ki la shet kylla ïa ka Congress da kaba leit pynïasoh sha ka NPP.
Uba wan phai biang mynta sha ka Congress u dei tang u MLA barim ka TMC u Zenith Sangma. Hato kane kan dei ki dak ki shin na ki MLA ba mynta TMC bad ki MLA barim kin wan phai biang sha ka sem Congress kumba long ka pharshi u khun sarong?
U nongïalam ka All India Congress Committee uba khmih ïa ka jylla Meghalaya u Dr. A. Chella Kumar ha ka jingïakren bad ki lad pathai khubor mynta ka sngi u kren kob ba ka party kam da salia than ïa ka jingphet seng jong ki MLA kiba ka party ka la pynjop hynrei nangne shakhmat ka party kan hap ban pynkhlaiñ biang ïa ka nongrim kum ka party kaba la rim tam hapoh ka ri India.
Hynrei haba phai pat sha ka jingbym don MLA shuh ka Congress hapoh ka Iingdorbar Thawain ka jylla ka la pynthylli bad pyntroiñ haduh katta katta ïa ka party. Ka jingbym lah synshar jong ki nongïalam ïa la ki jong ki MLA ka pynpaw ïa ka jingtlot treikam hapoh ka party
Ka jingkhie rasong jong ka NPP ha rilum Khasi Jaiñtia bad ha rilum Garo, ka jingwan mih jong ka Voice of the People Party (VPP) ha rilum Khasi bad Jaiñtia bad ka jingdon jong ka All India Trinamool Congress (AITC) ha Meghalaya ki pynpaw ba ki paidbah ki la kwah ban mad noh ïa ki party kiba thymmai namarba ki ladep ban ailad ïa ka Seng Congress ba kan bat ïa u lakam synshar da ki phew snem hapoh ka jylla Meghalaya.
Mynta ka Congress kan hap ban buh halade ïa ka jingkylli, hato kan dang leh neem ban khie khlieh biang ha ka elekshon ka ban sa long ha u snem 2028 hapoh ka Jylla Meghalaya? Ki nongthep vote ki bishar shwa ïa ka jinglong jingman jong ki seng saiñpyrthei bad shano ka lyer ka kham beh khnang ba kin dup lah ban rai ïa ka lawei kaba san snem.
Ka Congress hapoh ka ri India ka paw ba ka la mad ïa ka jingeh ha ki lai tylli ki bynta, kata, kum ka party kaba heh ha ka ri mynta ka la kylla long ka party ritpaid hapoh ka Parliament kaba nang ring sdot ha manla ki jylla ba ka ju khlain bha ha ki snem ba mynshwa, kaba ar, ka dei ka jingryngkang dieng kper jong ki nongïalam bad ki nongmihkhmat ka party bad ka jingtlot shaba palat ki nongïalam ym tang hapoh ka ri hynrei wat ha ki jylla, ki district bad ki Unit bad kaba lai ka long ka jingbym lah shuh ban ïoh ïa ka jingshaniah na ki paidbah namarba ki ladep ïohi ïa ki rukom treikam ha ki snem ba ka Congress ka dang bat ïa u lakam synshar hapoh ka ri bad ha ki jylla kiba pher bapher hapoh ka ri India.
Ha Meghalaya ka jingkyrmen ïa ka Congress hi ka long sa tang lada ka ïoh ïa ki riewtrei kiba aiti met bad mynsiem bad ïa ki kyrtong kiba lah ban ïoh biang ïa ka jingieid na ki paidbah ha ki Constituency hynrei lym kumta kan buh jingeh bha ïa ka party ha ka elekshon 2028.
Ki shalyntem ka por ki nang tyllun bad ka por hi kan sa batai. Ngin sa nang ïohi shuh shuh nangne shakhmat ïa ka jingkylla ha ka sainhima sima shwa ban poi ka tamasa jied syiem shi sien san snem.
