Hato tang namarba ki dei pyrshah ïa phi phi mut khanglad ba kin shim bynta ha ka saiñ pyrthei, ther ka HC ïa ka Sorkar

Shillong, Jylliew 13: Ka ïing Bishar High Court of Meghalaya ha ka sngi Ba-ar ka la takraiñ tyngeh ïa ka sorkar jylla halor jingwanrah ïa ka jingpynkylla ïa ka Aided College Employee Rule, haba shim bishar ïa ka mukotduma kaba ïadei bad ka Misc Case Writ Appeal ne ka jingkyrpad biang ka sorkar ïa ka ïingbishar ban bishar biang ïa ka mokotduma kaba ka la pyndam noh halor ka jingkhang jong ka sorkar jylla ïa ki nonghikai kolej kiba la ïoh jingïarap na ka sorkar (governtment Aided College) ba kin ïadon bynta ha ka saiñpyrthei ne ba kin ïakhun elekshon.
Haba shim bishar biang ha ka sngi Ba-ar ïa ka mukotduma State of Meghalaya vs Shri Brightstarwell Marbaniang & Ors, ka kashari jong ki arngut ki nongbishar ba kynthup ïa u Chief Justice u Justice Sanjib Banarjee bad u Justice W Diengdoh, u Justice Sanjib ha ka Oral Observation jong u la ong ïa u nongsaid aiñ jong ka sorkar ba ka jingpynkylla ka sorkar ïa ka rule ha kaba ïadei bad ki nonghikai kolej kiba hap ha ka government aided category u Chief Justice ka High Court of Meghalaya u la ong ba ka jingwanrah ka sorkar ïa kane ka jingpynkylla ïa ka rule ka dei beit ban khang ïa ki nonghikai kiba shim bynta ha ka saiñ pyrthei ka dei beit thik pyrshah ïa kito ki nonghikai kiba don ha ka liang pyrshah jong ka sorkar.
“Kane ka jingpynkylla ïa ka rule phin ym jin da wanrah lada ki dei na ka party jong phi hynrei namar ba ki dei na ka liang pyrshah phi pyrshang ban khang lad ïa ki da kane ka rule,” ong u CJ ïa ka sorkar ha u nongsaid aiñ jong ka.
“Kine ki nonghiaki kim hap ha ka thup bam armaloi, kim dei ki nongtrei ka sorkar, kumta kam lah ban tuklar ïa kane namar kane ka bynta la peit da ki Governing Body jong ki kolej,” u la ong.
“Kane ka la dei ka lynti Ïakjakor kaba ka sorkar ka shim,” u la kynthoh.
U Chief Justice, u la ong ruh ba ka Riti Synshar jong ka ri India kam khang ïa uno uno u nong India ban ïashim bynta ha ka saiñpyrthei ne kino kino ki kyndon aiñ lada ka kam kaba ki trei kam hap ha ka thup jong ka kam bam ar maloi ne Office of Profit.
U la ong ruh ba namar ka sorkar kam don bor eiei ban thung nonghikai ne ban weng ïa ki ne ban tuklar ïa ka rukom trei jong kine ki nonghikai ha kine ki kolej kiba ïoh jingïarap na ka sorkar, ka jingwanrah ïa kane ka jingpynkylla ka long kaba ym shong nia eiei namar ka bor halor kane ka shong beit ha ka Governning Body jong ka kolej ym satia ha ka sorkar la pynpaw u CJ.
U nongïasaid aiñ ba mih khmat ïa ka kynhun jong u Bah Brightsterwell bad kiwei u la kdew ba ka kyndon jong ka Representation of People Act bad kumjuh ki article jong ka Riti Synshar bad ruh ki rai bishar jong ka Supreme Court kam khang satia ïa kiba kum kine ki nonghikai ban shim bynta ha ka kam saiñ pyrthei.
Na ka liang u nongïasaid jong ka sorkar u la pynpaw ba ka jingïashim bynta ki nonghikai ha ka saiñpyrthei ne ban long ki nongmihkhmat paidbah ki don ki kyndon bad ki rai bishar jong ki High Court bad Supreme Court kiba ïadei bad kaba kum kane ka mokotduma kiba la khang ha kaba na ka liang u Chief Justice u la ong ba kine ki aiñ bad ki rule kiba la kdew kim long satia kiba shong aiñ shong nia lada pynïahap bad kane ka mokotduma ba ka kashari ka shim bishar.
Ka sien shong bishar biang halor kane ka mukotduma kan long biang mynta ka sngi Balang jong ka 14 tarik mynta u bnai.
Lah ban kdew hangne ba ka sorkar jylla ka la ujor mokotduma ban phah bishar biang ïa ka rai kaba la pynmih da u Justice HS Thangkhiew ha kaba ïadei bad ka jingpynksan jong ka HC haba shim bishar ïa ka mokotduma ba la ujor da u Bah Brightstarwell Marbaniang ha ka mokotduma ba la tip kum Shri Brightstarwell Marbaniang & Ors Vs State of Meghalaya kaba pynksan ïa ki nonghikai kolej kiba dei ha ka kyrdan Aided ki lah ban shim bynta ha ka kam saiñ hima sima, da ka jingpyndam ka HC ïa ka Clause 7.4.3 ka Meghalaya Education Policy 2018 bad ka hukum (notification) kaba ka pynmih ha ka 23 Lber 2021 ba la pynkylla ïa ka Aided College Employee Rule.