Shillong, Nailar 19 : U MLA ba thymmai ka NPP na Mawhati, Bah Charles Marngar ha ka sngi Nyngkong u la ong ba ka rukom pyrkhat ki briew mynta ka la hiar palat namar ki ïohi beit tang ïa kaba sniew bad ki matlah pat ïa kaba bha.
Ïa kane u Bah Charles Marngar u la kren hadien ba u la dep ban pynïasoh sha ka National People’s Party (NPP) kaba long ha ophis treikam jong ka NPP ryngkat bad arngut kiwei pat ki MLA Congress ba kynthup ïa u Dr. Celestine Lyngdoh bad Bah Gabriel Wahlang. Shwa kane, u Bah Gabriel u la ong ba shwa ba un pynïasoh sha kane ka party kaba ïalam ïa ka bor synshar u la ïa syllok shwa bad ki 1000 ngut ki nongïalam ba hakhmat jong ka party bad ruh ryngkat u nongai buit ba hakhmat jong u, u Dr. DD Lapang ba dei ruh u Myntri Rangbah barim ka Jylla.
“Lada kren shaphang ka jingieid Jaidbynriew balei u Bah Charles um ieid Jaidbynriew. Lada ngi don ha ka NPP phin ong ba ym ieid jaidbynriew shuh. Ngan ïathuh ïaphi, ym pat don u MLA na Mawhati constituency uba dalade hi un leit sha Karbi Anglong arsien tang ha u bnai ba la dep na bynta ki paidbah ha khappud,” u la ong.
Nalorkata, u ong ruh ba ka jingdon jong u ha ka NPP ka long ban ïatrei lang na bynta ka roi ka par bad ka jingmyntoi jong ki paidbah ka constituency.
Shuh shuh u ong ruh ba ka jingleit jong u sha ka NPP kadei namar ki ïohi ïa ka kam ba kane ka party ka leh bad kumta dei na kane ka daw ba u phaikhmat sha ka na ka bynta ban kyntiew ïa ka constituency kaba dang sahdien lut ha baroh ki liang.
U Bah Charles u la ong ruh ba ki kyrmen skhem ba ha u 2028 ka NPP na Ri Bhoi District kan jop lut baroh san tylli ki constituency na ki saw tylli ba ka don mynta.
Lah ban kdew hangne ba ki MLA ba ka NPP ka don ha Ri Bhoi ki kynthup naduh ka Jirang ba mihkhmat da u Bah Sosthenes Sohtun, nangta ha Umroi da u Bah Damanmait Lamare, ha Umsning da u Dr. Celestine Lyngdoh bad ha Mawhati da u Bah Charles Marngar. Kaba lait dei sa tang ha Nongpoh kaba la mihkhmat da u MLA ka UDP, Bah Mayralborn Syiem.
