Dangshen ka la mih ka khubor, ha kaba U Myntri Rangbah ka jylla Meghalaya u Conrad Sangma, uba dei ruh u Nongïalam jong kane ka sorkar synrop, ba un bujli noh ïa ki Myntri jong kane ka sorkar synrop Meghlaya Democratic Alliance (MDA) bad la ïohi, ba ki don kiba paw kyrteng kum U Rakkam Sangma, U Bah Shakliar Warjri, Bah Coming Ymbon, Bah AL Hek nalor kiwei pat bad lada kane kan jia, kumta katei ka pyni, ba kam dei ka jingbujli Myntri kaba mar shiteng por, hynrei ka dei noh, kaba shu weng ïa kito kiba u Myntri Rangbah um i bit shuh, ba kin dang ïai bteng kum ki Myntri ka sorkar MDA.
Hynrei lada ong, ban ïa ai bhah lem ïa kiwei de ki MLA, ban ïa long Myntri, ula dei ban sdang shwa nalade, lane lada jia ba um sdang nalade kum u Nongïalam ruh, ula dei ban sdang na ki Symbud Myntri Rangbah jong u, ha kaba un dkhat noh ïa uwei ban ai sha Garo Hills bad un pynsah noh tang uwei u Symbud Myntri Rangbah ha Khasi Jaiñtia Hills bad nangta sa ïa kiwei de ki 9 ngut ba un jied da kito ki bym pat ïoh ïa la ka bhah.
Ha kaba ïadei bad ka jingjied Myntri ruh, la ïohi, kumba U Conrad um da donkam than, ïa ki Myntri kiba tbit, namar ba kiba bun ki kam, ki la pynïaid lut na ka ophis jong u Myntri Rangbah bad la ïohi shai, ba ki don bun bah ki kam kiba ula pynïaid dalade, naduh ka kam rep, haduh ka ri jingri, haduh ka shang pyrthei, haduh ka Pule Puthi bad ha ka kam pynroi nongkyndong da ki skhim shna ïing, ki skhim ïarap ïa ki duk ki raitoi bad kaba shai bha hi ka long, ba ula tip lut nalade bad ki Myntri kin shu long tang ki nongsoi kyrteng, ïa ki projek, kiba la nang pynïaid da ka tnat Basin Development, nangta ka Meghalayan Age bad sa kiwei kiwei de kiba la khlieh da u Myntri Rangbah.
Ngim tip, ïa kaei ka jingïohi jong kiba bun, halor ka jinglong jingman jong kane ka sorkar, hynrei, kumba la kdew haneng, ka pyni shai, ba kane ka dei ka sorkar kaba don beit tang uwei u Nongïalam bad ka jingtreikam jong kane ka sorkar ruh, ka shong beit lyngba ka jinglah jong u, ban pynïasnoh ïalade bad ka Delhi, ha kaba u lah ban wanrah ïa shibun ki projek, wat la kiba bun ki dei kiba shu pynkitram ïa ka jylla.
Kaba ima pat ka long ba kiba bun na kine ki projek, ki dei kiba shu ïoh ban ïa shondur ne ban pyni paidbah, ïa ka jingmang pisa kaba la sha bneng, katba ka jingmyntoi pat ka long ka bym ïahab haei haei ruh bad kawei na ki jingshisha, ka dei kato ka skhim FOCUS, kaba la bret pisa ha ki snem 2021-2022, kumba ba bret sla dieng, hynrei katei ka skhim kam pynmih soh ïa ka sorkar ne ïa kiba ïoh ruh, namar ka dei tang ka skhim bam nokot kaba shisngi.
Ngin dang ïa peit ïa kaei ka ban paw pyrthei ha ki sngi ki ban sa wan, hynrei ka jingbujli Myntri, ka dei ruh ban ïaid ryngkat bad ka jingbate kam bad ki don ki tnat kam kiba la shah thad la jhor ha ki kotkhubor bad lada dei ha ka tnat um, la ïohi, ba ki mih tang ki jingshah kynthah, nangta ha ka tnat surok, bun sa ki jingshah beiñ ba har rukom, nangta sa ka tnat rep, kaba mih bunbah ki jingujor halor ka jinghiar dor ki mar rep mar riang bad ki katto katne ki tnat ki long kiba donkam ban wad da kiba kham sngewthuh, ba kin nang pynbha ïa ka jingkhmih lynti jong u paidlang ka jylla Meghalaya baroh kawei.
Ka la dei ruh ka por ba ngin hap ban pynshong nongrim halor baroh ki Tnat Sorkar jylla naba kumba ka long ha kine ki Sngi tang ka tnat tourism kaba kham paw ba ka la pyni ïa la ki kam bad ki jingpynlut ruh ïa ka pisa imat kan sa jhor bha bad ngin sa ïa peit pat ïa ki jingpynbna ïoh nong bad katno pat ka la aikam ïa ki khynnah samla ka jylla khamtam eh kito kiba la pyndep ïa ki jingpule bapher bapher kiba la shu ïaid sharum shaneng bad kiba thiah kai ha la ki jong ki ïing ki sem, ïa kane bad kiwei kiwei ki kam jong kiwei pat ki Tnat Sorkar jylla na ka liang ki paidbah kin hap ban sa khmih bniah bha, khamtam eh na ki nongmihkhmat ba ki la jied.
