Hato la pynkhreh ka Eastern West Khasi Hills lada khynñiuh u Jumai

Mairang, Naiwieng 15: Ka 1st BN National Disaster Response Force (NDRA) ha ka jingïatreilang bad ka District Disaster Management Authority (DDMA) Eastern West Khasi Hills District, mynta ka sngi ka la pynlong ïa ka NDMA level Mock exercise halor u jumai u ba lah ban wan lyngshop ha kano kano ka por. Ïa kane ka Mock exercise la pynlong ha Mairang Presbyterian Science College kaba don ha ka shnong Sangshong.
Ha kane ka Mock Exercise, da kaba shim nongmuna katkum na ka jingjia khynñiuh jumai kaba ka jingjur ka long 6.5 magnitude ha u Richter Scale kaba la pynlong ruh ba kan don ka jingtwa khyndew, jingkhyllem ki ïing ki sem bad ka jingpluh ding.
La pynïaid ïa kane ka kam katkum ki kyndon jong ka Incident Response System (IRS) bad la pyntreikam ruh ïa baroh ki section jong ka Incident Response Team kaba kynthup ïa ka Operation, Planning bad ka Logistic Section.
La buh ruh ïa ki jaka sumar (relief camp) ha ka compound jong kane ka college. ïa kane ka relief camp la buh khnang na ka bynta jong kito kiba shah kthah ban kin ïoh jingsumar kloi.
Ka jingthmu jong kane ka Mock Exercise ka long ban pyni ïa ki rukom treikam bad ki kamram jong baroh ki dkhot kiba hap ha ka Incident Response System (IRS). Kumjuh ruh ban pynsngewthuh hapdeng ki samla pule bad jingpynkhreh kaba paka jong ka College lada jia ba don ka jingjia khih jumai.