K a jingbamsap ka la jyllei pleng, ha ka jylla ha kine ki sngi bad katei ka paw, na kawei ka jingjia sha kawei pat bad lada ka jingtreikam jong kane ka sorkar MDA, ka long ha kane ka dur, kumta ka plie ïa ka lad kaba biang bha ïa u prah, ba un nang thad madan ïa ki kam jaboh, kiba la jia na ka por sha ka por bad wat ïa ka BJP, kaba dei ka kmie jong kane ka sorkar, ba kan ther biang, ha u snem 2027-28, ba ka jingbamsap kane ka sorkar, ka long kaba la jubor tam ha baroh kawei ka India, kumba ka la dep kren ha ka elekshon 2023.
Kane ka jingbamsap, ka dei kaba la ïakren paidbah ha kine ki saw, san snem ba ladep, ha kaba la ïohi shwa ïa ki trok kit dewïong kiba tap tyrpa, ba ki ïaid pawang ha ki dong ki lad jong ka ri Khasi bad ba ki poi haduh ha ki surok bah ha Shillong; hynrei ha katei ka por, ym don mano mano ba tuklar bad haba ki sengbhalang, ki leit bat ïa kitei ki trok ruh, hynrei ka sorkar jylla, kam tuklar eiei satia.
Kumta hadien 5 snem, ba u paidbah bad ki sengbhalang, ki la ijli sat ïa katei ka jingkit dewïong beaiñ bad ba ka mih sa ka kyntien high level, ka shai kdar, haba ka Enforcement Directorate (ED), ka leit lap hi ïa ka jingshalan tuh dewïong, na ka jylla, kaba haduh 1,200 ton antad ha ka shisngi, na ki par dewïong ha South Garo hills.
Kam dei tang kata, dang katto katne taïew, ka mih sa kawei ka khubor bad katei ka dei halor ka jingjah rngai jong u dewïong haduh 4000 Metric Tonne, ha kaba u myntri jong kane ka sorkar MDA, ula pynksan, da kaba kynnoh, ba ka dei na ka jingjur slap palat bad katei ruh ka la pynbitar lep ïa ka Supreme Court, ha kaba ka la pan jingshai mardor halor katei ka jingjia.
Mynta pat ka wan sa kawei ka jingjia kaba kham sniew shuh shuh bad katei ka dei, ba u trai jong ka GM Coke, kaba don ha Byrnihat, ula buhrieh ïa ka khajna GST, kaba la kot sha ka T.150 klur bad mynta ula shah kem ha ki pulit Assam.
Kane kam kut tang katta, hynrei hangne ruh ka don ka jingïasnoh ïa ka jingujor jong ki paidbah kaba la bun snem kynthih, halor ka jingmih ki karkhana coke, ki bym ithuh ithaw shuh ha West Khasi hills, ha Jaiñtia hills, ha kaba kine kiba don ha kane ka kam, kim sngap shuh ïa ka jingujor ki trai shnong, hynrei ki tei beit shait shait bad ki pynring mynsiem da ka tdem jaboh ïa ki riew paidbah sha kylleng ki jaka.
Mynta pat la ïohi, ba utei uba shah kem, U Shiv Kumar Mittal, u ju thied Coke na ki karkhana kiba la shu shna thok, na ka bynta ban ïoh khaïi khlem siew khajna sha ka sorkar bad kumta ka tnat GST, kan dang khynra sa shibun ki jaka, na ka bynta ban wad ïa ki jingshisha, halor katei ka bynta ruh.
Ki jingjia kim long kiba sngew tynnad, namar ba ki la pynlehraiñ ïa ka jylla hi baroh kawei bad ka sorkar jylla, kam dei shuh ban buhrieh, hynrei ka dei ban aiti ïa ka aiñ, ba kan tian bishar, kat ïa kiba donkti bad ba kin mad ïa ka jingsaja, kaba ki dei hok ban ïoh.
Nalor ki marpoh khyndew, mynta kan lah ban mih sa kiwei pat ki kam bamsap kiba kynthup ïa ki project bapher bapher kiba la Sorkar jylla ka thmu ban pyntreikam ha ki jaka bapher bapher, ba kynthup naduh ïa ka tnat ki kam jngohkai pyrthei, kiba thmu ban beit tyngka da ka sorkar ne da kiwei ki karkhana ne wat na ka ADB.
Ha ka ïohi, imat kane ka Sorkar ka thmu ban pynlutksan ha ka kyrteng ki projek ne kam Pynroi bapher bapher hynrei kaba phylla pat ka long ba tang kiba la pyntreikam lypa ki dang sah teng kaba ngim tip haduh lano kin dep bad mynta kan beit ha ki paidbah ban bishar ïa ki rukom treikam jong kane ka Sorkar jylla Meghalaya ka Meghalaya Democratic Alliance hapoh ka jingïalam u Conrad Sangma kum u Myntri Rangbah ka jylla Meghalaya.
