Hato kin khang noh ïa ki nongrwai ban wan rwai ha Shillong lada ki ïoh ban thaw sorkar

Shillong, Nohprah 16 : U Myntri ka tnad Pule Puthi ka sorkar jylla ba dei ruh u nongïalam NPP ha ka Jylla, u Rakkam A Sangma ha ka sngi Nyngkong u la buh jingkylli ïa ka Voice of the Peoples Party (VPP) hato kan khang noh ïa ki nongrwai ba kin wan rwai ha ki tamasa rwai ha Shillong lada jia ba ki ïoh ban thaw ïa ka sorkar hadien habud.
Kane ka jingbuh jingkylli jong u, kadei hadien khyndiat sngi ba ka VPP ka la ong ba ki tamasa rwai ki long tang kum ki ‘painkiller’ na ka bynta ki paidbah ba kin klet noh ïa ki kam bamsap bad ki jingeh ba ka jylla ka kynduh.
“Shu buh jia ryngkhat ha kawei ka sngi ki ïoh ban thaw ïa ka sorkar hato kin ym ailad shuh ïa ki nongrwai kum ka Shillong Chamber Choir ban rwai ha Shillong. Kane ka dei kaei kaei kaba ym sngewtynnad satia na bynta ki khun samla jong ka jylla. Ngam sngewthuh shuh kaei kaba ki mut haba ki ong kumto. Hato ka lah ban dei ba kim sngewtynnad ïa ki jingrwai? Kumta, lada ngam bakla, ki bahaiing hasem jong ki, ki nongkyrshan jong ki, ki lah ban leit peit lang ha kato ka sngi (ba wan u Bryan Adams),” bynrap biang u Rakkam.
Shuh shuh u ong ba kine kiei kiei ki pynduh mynsiem bha bad kumta kan pynlong ruh ïa ki khun samla ka jylla ba kin ym pdiang bad kin ym mynjur satia.
U Myntri u ong ruh ba na ka liang jong u lei lei u kwah ba kin dang don bun shuh ki nongrwai ba pawnam ha ka pyrthei kham palat ban ïa u Bryan Adams ba kin wan ha Meghalaya.
“Shu buh lada u Rakkam u rwai ha Madan Polo ki paidbah kin wan sha Shillong ban wan peit? Hato ki hotel kin dap lut da ki paidbah? Yn ym don mano mano ruh ban wan. Hynrei ha ka por ba wan rwai u Bryan Adams ngi ïohi baroh ki hotel ki dap lut, ki dukan ki dap, man ki kali ki dap bad ki paidbah ba bunki wan na kylleng ki jaka kynthup naduh Assam ban wan leh kmen bad pynlut ha kane ka jylla. Kumta kane kam kut tang ha kaba wan rwai hynrei ki wan ruh ban pynlut ha Meghalaya,” u bynrap biang.
Kumta, u ong ba ha kum kane ka juk ban ym pdiang ia ki nongtem nongrwai kiba la paw ha ka pyrthei ba kin wan sha Shillong ka long kaei kaei kaba ym lah pdiang naba baroh ki nongshong shnong ka Shillong ki sngewtynnad ia ki jingrwai bad ki sngewtynnad ruh ban rwai.