Nongstoiñ, Jylliew 15: Ïa ka jingïalang kaba ai jingai jinghikai ïa ki nongrep jong ka thain, ïa kaba la pynlong ha Nongstoiñ College kaba la ïaid mynta la kumba lai sngi lynter, la pynkut noh mynta ka sngi ha kaba u Pa’iem Phylla Sing Syiem, Syiem ka Hima Nongstoiñ, u la wan ban pynhap pyrda ïa katei ka jingïalang kum u kongsan ha ryngkat ka jingïadon lang ka Dr R.K.Tombisana Devi Profesor, College of Post Graduate Studies in Agricultural Science, Umïam, ka Dr.I. Mawthoh Principal Nongstoiñ College bad kiwei kiwei ki riew rangbah jong ka thain.
Kum ban shu pynkynmaw ïa katei ka jingïalang la pynlong da ka College of Agriculture, CAU (I), Kyrdemkulai, Meghalaya bad ka Nongstoiñ College, ryngkat ka jingtreilang bad ka NECTAR Shillong, IRRI Philippines, NABARD Shillong, ICAR IIVR Varanasi, ICAR CICR Nagpur and IUOA Shillong Meghalaya, kaba dei ruh ka jingïalang kaba kyrpang na ka bynta ki nongrep ha Nongstoiñ College, ïa kaba la tip ruh kum ka “Farmer Innovation Expo-2022, Integrated Agriculture for Rural Bio- Entrepreneurship and Livelihood Security”.
Lah ban pynkynmaw ba ha ka sngi sdang jong katei ka jingïalang, la ïadonlang ki saïantis kiba kynthup ïa u Prof. Dinabandhu Sahoo, Director Centre for Himalayan Studies, University of Delhi, New Delhi, u Dr. M.S. Behera Principal Scientist, ICAR-Central Research Institute on Jute and Allied Fibres, Barrackpore West Bengal, u Dr. U.K Behera Dean CoA Kyrdemkulai CAU Meghalaya and Chairman FIE 2022.
Na ka liang u Pa’iem u la ong ba ki paidbah hi ki dei ban sngewthuh ba ka kam rep, ka dei kaba kongsan tam namar kumba long haduh mynta hi khambun na ki nongshong shnong jong ka Jylla ki dei ki nongrep. Kumta lada khlem ki nongrep ki paidbah kim ym ioh bam bad ka dei ka kamram jong baroh ban kyrshan kyrpang na ka bynta ki nongrep ha ka dong ka thaiñ bad ha ka Jylla hi baroh kawei.
Ha kine ki lai sngi lynter, ki nongrep kiba na ka thaiñ ki la ïoh jingmyntoi shibun, namar kane ka long ka sien kaba nyngkong ba ki saiantis na nongbah Delhi, kin hiar shaduh sha sor Nongstoiñ. Ka jingmyntoi ka la long lang ruh ïa ki nongrep kiba na ka thain jong ka Mawthadraishan, Nongstoiñ bad ka Mawshynrut, kiba la wan ban ïashimbynta shitrhem ha katei ka jinghikai ïa kaba la pynlong naduh ka 13 tarik mynta u bnai Jylliew.
