U Bah Shemborlang Rynjah, U MDC uba dang shu jop dang kumba hynñiew bnai mynta, ha kane ka sien kaba nyngkong, na ka Lyngkyrdem Laitkroh Constituency bad na ka seng VPP, ula hiar shuki noh, kum U Chief Executive Member jong ka Khasi District Council, na ka daw ba u pang. Utei u rangbah, um shym la ïathuh ïa ka jingpang aïu ba u don, hynrei katei ka rai ba marwei jong u, ka la pynbunkam ïa ka dorbar jong ka Khasi District Council, ba kan hap shong kyrkieh sa shisien, ban jied ïa U CEM ba thymmai bad kumjuh ruh ban jied ïa ka Executive Committee ba thymmai.
Ngim tip ïa kaei kaba ka sorkar jylla, ka pyrkhat halor kane, ha kaba kan lah ban pynjari noh shwa da ka synshar jong U Lat, na ka bynta katto katne bnai, kat haduh ban da pynlong ïa ka elekshon CEM ba thymmai bad ban thaw ïa ka EC ba thymmai ha ka Council.
Ka phang, kaba dei ban ïakren hangne, ka long pat ba haba U CEM u pang, kumta um sngew lah shuh ban kit ïa ka lyngkor, kum u nongïalam jong ka Council, kaba shong dorbar tang kumba ar taïew antad ha ka shisnem bad nangta, kaba u hap leit trei naduh 11 ne 12 baje nohsngi, haduh 5 ne 6 baje janmiet, ha ka sngi nyngkong haduh ka sngi Thohdieng, katba ka jingshisha ka long, ba ha shwa jong ka shuki CEM, ka wan shwa ka jingjop ïa ka elekshon MDC bad nangta shuh shuh, haba ïakren ïa ka lyngkor jong ka kam MDC, ka khia shibun, namar ba ka dei kaba hap ban ïakynduh briew, man la sngi da ki bun bun kynta, ban ïa kren ïa kiba bun bah ki mat kiba rit bad kiba heh bad ban ïaid ban ïeng sha ki jingïalang lane ki prokram bapher bad kumta kitei ki jingshisha, ki pyni, ba ka kam MDC, ka khia shibun shah pleng, haba ïanujor bad ka shuki CEM.
Ka jingkylli ka mih namarkata, ba lada U Bah Shemborlang, u sngew kitkhlieh halade, lada um lah ban trei bha, kum U CEM jong ka KHADC, kumta u sngew kitkhlieh ne em, lada um lah ban trei bha, kum U MDC jong ka Lyngkyrdem Laitkroh bad lada u shim ba ka jingpang jong u, kan pynthut ïa ki kam jong ka EC ha KHADC, kumta, u shim ne em, ba ka jingpang jong u, kan pynthut ïa ki kam ki duk jong ka Constituency ba u mihkhmat?
Haba kumta, ka jingkylli, kaba wan hakhmat jong uba bun, ka long la un resain tang U CEM ne kumjuh kum U MDC ruh?
Kumta kane ka jingieh noh ïa ka kam CEM KHADC ka lah ban long ruh na kiwei pat ki daw nalor ka jingpynpaw halor ka Koit ka Khiah hynrei ka lah ruh ban don shuh shuh kiwei pat ki jingeh kiba kum u CEM KHADC barim u Bah Shemborlang Rynjah u lah ban mad kaba um sngewlah satia ban pynpaw.
Wat la ka dei ha ka sien kaba nyngkong ba u dang jop kum u MDC bad kumjuh ruh kum u CEM ba nyngkong eh ha ka jingim bad uba dang thymmai eh ban bat ïa kane ka lyngkor kaba khia kam long kaba suk ki jingdawa ban pynbha ïa ka kam kam dei kaba suk khamtam eh haba ka KHADC kadei kaba lah bun bha ki kynrum kynram naduh ki por mynshwa ne lah ban ong ba ka la dei lah da ki phew phew snem mynshwa kumta ban pynbiang pynbeit ïa kane ka kynrum kynram kaba lah slem bha kam long kaba suk ïa kiba dang thymmai watla ki angnud ban pynkylla thymmai ïa ka KHADC namar kin hap ban pule lut ïa baroh ki file ne ki jingthoh ha shwa ba kin shim kam namar ïoh poi ïa tyngkhuh kam pat sa bad ka aiñ ne Ïingkashari kumta tang haba pule shwa ïa baroh ki file jong ki Tnat bapher bapher kan shim por ruh wat shi samoi treikam ne san snem, kumta hap ïoh da u MDC uba shemphang, uba nud ban shimkam bad uba tip bha ruh ïa ki aiñ ki ka nun bad kane ka shong mynta ha une u CEM KHADC ba thymmai uba dei ruh u MDC ka Nongthymmai Constituency bad uba dei ruh u dkhot u bym pat da slem than imat hapoh ka seng Voice of the People’s Party (VPP).
