Nongstoiñ, Ïaiong, 21: Ki paidbah jong ki 23 ki shnong kiba don ha ka thaiñ Kyrshai, haduh mynta ki dang don hapdeng ka jingartatien la ka sorkar Assam ka la rai ne em ban sangeh ban den ïa ka wah Khri na ka bynta ban pynmih bording, kumba ka la aiti ha ka Brahmaputra Board ba kan pyndep ïa ka jingsorbe naduh u snem 2000.
Ha kaba ïadei ban katei ka jingthmu jong ka sorkar Assam ban tei ïa katei ka projek bording, u Bah P.Syiem President jong ka Kyrshai Area Development Organisation (KADO), ryngkat ki nongïalam jong ka Federation of Khasi Jaiñtia & Garo People Kyrshai Area Unit, haba ïakren bad u nongthoh khubor, ki la ong ba haduh kine ki sngi, ki paidbah katei ka thaiñ ki dang sngew artatien bad kim pat sngewthikna la ka sorkar Assam kan sangeh shisyn-don ne kan bteng ban pyntrei ïa katei ka projek.
Utei u nongïalam ka KADO, u la ong ruh ba naduh ba katei ka Brahmaputra Board ka la sdang ban wan sorbe ïa katei ka jaka ha ka por ba u (L) Bah E.K.Mawlong u dang long kum u Myntri Rangbah ka jylla bad u Bah Martle N Mukhim u dang bat kum u Myntri ka tnad bording, ki la phah da ka jingthoh sha ka sorkar ba ki paidbah ka thaiñ kim shah da lei lei ba ka Assam kan pyntrei ïa katei ka projek.
U la pynkynmaw ruh ba hadien ba ki la phah ïa katei ka jingthoh, ka sorkar ka la phah ruh sha u Additional District Magistrate ka West Khasi Hills u bah S.Kharlyngdoh ba kin wan jurip ïa katei ka jaka. Ha katei ka por, ki la pynlong ïa ka jingïakynduh lang ha ka jaka sah jong ki nongtrei jong katei ka Board ha Kyrshai, ha kaba u Myntri kam bording ka jylla, ka Engineer ba peit ïa ka Brahmaputra Board, u (L) Bah Hopingstone Lyngdoh MLA ki la ïadonlang bad ki la rai ba dei ban pynsangeh shisyndon ïa katei ka projek.
Hynrei kaba lyngngoh ka long ba dang ha kine ki snem ba la dep, katei ka Board ka la wan pynkit pynban ïa ki mashin ha katei ka jaka bad ki la thmu ban sdang pyntrei biang ïa katei ka projek. Nalor nangta dang shen ki heh sorkar bad ki ophisar sorkar na West Khasi Hills, ki dang leit ban jurip sha katei ka jaka, ha kaba ka la wanrah ka jingartatien kaba jur sha ki paidbah nong-shong shnong.
U la ong ba na ka liang ki paidbah shnong jong katei ka thaiñ ki dang ieng skhem ha ka ban pyrshah bad ban ym ailad da lei lei. Kumta na ka liang jong utei u nongïalam ka KADO bad ka FKJGP Kyrshai Area Unit, ki dawa ïa ka sorkar MDA ba la ïalam da u Conrad K Sangma, ba ka dei ba ïakren bad ka sorkar Assam ba ka dei ban pynthikna ba kan sangeh shi syndon ban pyntrei ïa katei ka projek.
Ka sorkar ka dei ban pynbna da ka jingpynbna paidbah, namar u la ong ki paidbah jong katei ka thaiñ kim shaniah lada ka sorkar Assam ka shu kren tang da ka ktien. Kumba ka long ha ki thaiñ Langpih wat haba ka Status quo ka kdew shai ba ym dei ban pynwit haba pyntrei ïa ki kam pynroi la ki dei na ka sorkar Meghalaya ne na Assam. Hynrei ka Assam kam ju burom satia bad ka ïai pynthut bad pyndik beit ha kaba ki kam pynroi kiba ka sorkar Meghalaya ka pynpoi sha ki paidbah ki sahkut lut.
