Hato ka Sorkar kan shu sngap jar ïa ka prokram D.El.Ed ba pynïaid da ka NIOS: MSWDA

By Mawphor Editor On Sep 15, 2022

Shillong, Nailur : Ki skul bapher bapher hapoh ka jylla ki dap da ka jingsngewkhia halor ka prokram Diploma in Elementary Education (D.El.Ed.) ba la pynïaid da ka National Institute of Open Schooling (NIOS) katkum ka jingïateh jong ka Sorkar na ka bynta ban ai jinghikai pynttbit ïa ka bynta ki nonghikai kiba la don lypa ha ka kam khnang ba kin ïoh ïa ka kyrdan katkum ki kyndon jong ka NCTE.
Kum ban shu pynkynmaw, ki don kumba 7822 ngut ki nonghikai kiba la phah ban pyndep ïa ki jingshah hikai pyntbit lyngba ka NIOS ha u snem 2013-2015 bad 2015-2017 (Offline) ïa kaba la bei pisa da ka Sorkar Pdeng bad Sorkar Jylla.
“Hynrei kaba sngewsih ka long ba ki dang don bun ki nonghikai ki bym pat ïoh ïa ki Original Marksheet bad ka Certificate haduh mynta na ka NIOS. Ki nonghikai bapli ki la phah ïa ka ujor jong ki lyngba ki Study Centre, State Nodal Officer NIOS, bad Regional Centre, Guwahati na ka bynta ki jingeh jong ki ha ka Result ba la pynmih da ka NIOS namar ba ki don bun ki jingbymbiang (anomalies) ha ka Result kumne harum,” ong u President ka Meghalaya Schools Welfare Development Association u Bah HM Marbaniang.
Ki jingbym biang ki long, ka jingshah thoh Absent ha ki sobjek ba la thoh eksamin bad ka jingshah pyn phiel lane sha ai Absent ïa ka sobjek kaba ki ladep pas. Kumjuh ruh ka jingbym ïoh ïa ki Original Marksheet bad Certificate wat lada ki ladep ïa ka Training. Kane ka jingbym ïoh ïa ki Original Marksheet /Certificate kumjuh ruh ki jingbymbiang ka jia ruh ïa kiba bun ki nonghikai kiba leit ïa ka training D.El.Ed na ka NIOS ha u snem 2017-2019 (Online).
“Kane ka ishu jong ki Offline Batch 2013-2015 bad 2015-2017 ka dei kaba la slem kumba ngi lah ïohi ïa ki jingïakhih jong ki nonghikai ha ki snem bad ki por kiba ladep, hynrei watla ki la ïai ap bad ïaishah da kaba ngeit ïa ki jingong na ka Directorate of Educational and Traning (DERT) ba kin sa biang bad sa poi, hynrei haduh mynta kam shym poi shano shano ruh,” ong une u nongïalam ka Seng.
Halor kane ka Association ka kwah ban shai la ka Sorkar ka la ïoh jingtip neem halor kane na ka Department bad haduh katno ki dang don kine ki nonghikai ki bym pat ïoh ïa ka Original Marksheet bad Certificate kiba la biang pura.
“Halor kine ki jingeh ngi kyntu ïa ki Nongmihkhmat kiba sngewkhia ba kin ïatai ha Assembly bad ban pan jingshai haduh katno ki nonghikai ki la biang pura ïa ka Professional Training kaba long shi bynta jong ka Quality of Education bad kaei ka sien jam ba kala buddien ïa kine ki jingeh kiba don ha ki nonghikai. Lada ki nonghikai ki leit buddien sah ïa kane, kan ktah ïa ka kam hikai jong ki,” u la bynrap.
“Ngi kyrpad ïa ka Sorkar ba kan shimkhia halor kine ki jingeh bad ngim kwah ban ïohi ba ki nonghikai kin mih surok biang ban ïakhih halor kine ki jingeh namar kan ktah ïa ka skul bad ka jingpule jong ki khynnah skul. Hynrei lada ym banse namar ba ka dei ka ishu kaba ktah ïa ka kam jong ki nonghikai (service) na ka liang jong ka Association kam banse ban shim da kawei pat ka lynti,” la maham u Bah H.M. Marbaniang.