Shillong,Kyllalyngkot 04: Ka long kaei kaei kaba sngewthamula ban ïohi ba ka BJP ha Meghalaya ka ïaleh dohiap ban tep eitmiaw ïa ki kam thombor pyrshah Khristan jong ka Sangh Parivaar ha kylleng ka ri India tang ban da rapjot namar ba la jan ka election sha ka Assembly jong ka Meghalaya.
Khyndiat na ka bynta jong kito ki paralok ki bym pat tip kaei ka Sangh Parivaar, Ka Sangh Parivaar ka dei ka seng Hindu ba kynthup ïa ka Rashtriya Swayamsevak Sangh (RSS), Bharatiya Janata Party (BJP),Vishwa Hindu Parishad (VHP), Akhil Bharatiya Vidyarthi Parishad (ABVP), Bajrang Dal ka seng samla jong ka VHP, Bharatiya Kisan Sangh bad wat ka Shiv Sena ruh. Dang khyndiat bnai ka Jylla ka la sakhi ïa ka jingpyrshang jong u Mahon Bhagwat u hehduh ka RSS ban kynthoh ba ki nong Meghalaya ki dei ki Hindu, ha ka jingkren jong u hangne ha State Central Library.Kata ka la biang ban pynkhih ïa ka skum jong u dkhewiong.Ka thong jong kine ki seng baroh ka dei ban pynlong ïa ka India tang kawei ka niam,kawei ka ktien bad kawei ka culture bad kata ka dei ban kdup ïa ka Hindutva ideology.
Dangshen,u Saurav Jyoti Saikia APS, Superintendent of Police SB (E/Z) Assam Kahillpara,Guwahati ha ka shithi jong u ha ka 16 th December 2022 sha u Deputy Commissioner of Police (Int.) u la bthah ban peitngor bad ban phah kaiphod halor ka jingïalap bad jingpynkylla niam ki khristan hapoh kine ki hynriew snem ban ai report ïa ki Balang Khristan hapoh ka jylli jong ki bad ban jer kyrteng ïa u ne ki briew kiba don bynta ha ka ban pynkylla niam bad kumta ter ter. Haba kiwei pat ki party kum ka TMC, UDP bad kiwei ki pyrshang ban ther kylla ïa katei ka shithi ba don jingthmu da kumwei pat ha lyndet pyrshah ïa ka jingïalap niam ba laitluid ha India, ka BJP hangne ka ïaleh ban da rapjot halor katei ka kam kaba ktah mat-ïong ïa ki Khristan,da kaba kynnoh kylla ba ka TMC ka leh politics. Hynrei ki ïaleh pynban ban pynthame da ka development jong ka sorkar u Modi. Hato yn bieit ïa ka development haba ka jingngeit Blei ba laitluid jong u briew la nangsyngit? . Katba kim pat ïoh ban synshar janai ki pyndemkhwai da ki jingbam ba ibang khnang ba ki khaheh kin ngat ha ruh jong ki. Don uwei u politician uba dang shu mih na ka BJP bad phet sha ka Congress mynta, mynshwa u ong, lada ym rung mangi ki khristan sha katei ka party hindu ym don ba ïada, jait ba don mangi kim nud, u ong. Hynrei kaei kaba jia, ynda haba u nongthoh u kylli balei pat phi mih na ka BJP,u jubab nohmynsiem, ym don ba patiaw ba kheiñ briew iangi hangtei. Ka mut, ka sur jong u ka long kum ka jingpyrta ha rikhlaw.
Ka jingpyrshang jong ki katto katne ki snar ka RSS ban phah weng noh ïa ka kyntien Secular ne (ka ri ba kdup lut ïa ki jait niam)na ka Constitution jong ka ri India, ka dei kawei na ki mat ba shai kdar. Ym tang katta,ka jingphahweng noh u Modi ïa ka jingrwai Hymn jong ki Khristan kiba u Mahatma Gandhi u sngewtynnad eh kaba “To shong bad nga,Ah Trai ka sngi la noh ( Abide with me)” na ka Beating Retreat hadien ka Republic Day ka dei kawei pat. Nangta,ki la sdang ban khynñiat pynlong aiñ sa ka Uniform Civil Code (UCC) nalor ka jingpynduhnoh ïa ki lad funding jong kiwei ki ri sha ki khristan ha India.
Katno ngut na ki paid jong kane ka jylla ba ïohi ba ka BJP ka kup durbula ban ïoh synshar hangne namar ka RSS ka partner jong ka ki tip biang biang ba kane ka dei ka lyngkha ba seisoh bha na ka bynta ka Hindutva jong ki. Mynta,ba kim pat da biang paid te kim pat nud ban ïaleh pyrshah khristan. Hynrei,jia aiu ïa ki khristan ha Narayanpur Chhattisgarh ha kine ki sngi shwa Khristmas ?. Hato ym dei ba ki ñiom jubor da kaba pynmynsaw mynsnam ïa ki khristan kiba don ha kato ka jaka ?. Hato katno ngut ki bor jong ka aiñ ki la set phatok ïa ki riewshongshit niam Hindu, kiba shu pyrta Jai Sriram lynter ?.
Ka jingbymnud jong ka BJP Meghalaya ban condemn ne ban pynrem ïa ka jingshah lehbeiñ jong ki khristan ka don ei ei sha lyndet,namar da kren ruh ïoh shah syngit ryndang ha ki heh jong ka party na Delhi.
Ngim dei shuh ban dangsngew lyngngoh, ban pynurlong ïa katei ka jingthmu Hindutva,la jan baroh khoit ki Institution, ka sorkar India ka la dep thung da ki briew lajong. Ka sorkar ritpaid BJP jong u Sanowal ha Assam kam pat da nud than eh ban khynra Khristan ne Muslim hynrei ka sorkar bunpaid jong u Himanta Biswa Sarma ka la sdang ban khynra tyngeh khnang ban pynshisha ba u dei u karsevak uba khlaiñ. Haduh mynta,ym pat don kawei ruh ka case ba ki rai ban sdien phasi ne set along shi jingim ïa ki shongshit niam hindu (hindu fanatics) wat la lap tyngkreiñ ba ki donkti ban pyniap ïa ki nongkhaïi dohmasi, ïa ki nongïalam niam khristan.U Dara Singh Bajrang Dal, uba thangim ïa u Missionary Graham Staines bad ïa arngut ki khun jong u ha Keonjhar Manoharpur,Odisha la ai VIP treatment ha jail kumjuh ruh ïa ki sawngut kiba pyniap ïa u Revd Fr. Arul Doss ha ka 2 nd September 1999 uba la shah siat da u khnam bad mareh lamwir ha ka jingphleisnam bad iap ha trai jong ki diengsnepkor ha Jamuboni, Keonjhar. Ym pat ju ïohsngew ba u Prime Minister Narendra Modi un pynrem ïa ka jingshah thombor ki khristan ha ka programme “Maan ki Baat’ ne ha kino ki Tweet jong u katba ïa kiwei pat u stet bha, ka mut aiu kane ?.
Ym pat ju ïohi shisien ruh ba ka BJP ha Meghalaya kan pynmih press statement ban pynrem tyngeh ïa ka policy pyrshah khristan ha India, te kumno kan ïoh jingshaniah na ki paid jong kane ka Jylla. Ka ktien ka ong ‘na ki kam jongphi yn ithuh ïaphi’. Ka ri kaba skhem ka dei ka ri kaba burom kylliang ïa ka dustur,ka riti bad jingngeit blei jong kiwei pat ki para jaidbynriew, ym kiba pynksan tang ïa ka malade.Uwei u rangbah u sheptieng lymda ka sorkar India kan teh lakam mardor ïa ka jingïasngewpher niam khlem pep ka thma pohïing (civil war) kan jia, lada ka long kumta mano ban kitkhlieh ?.
