Teng teng haba ngi duriap bha halor kiei kiei kiba jia ha kane ka sor Shillong ki don shibun kiei kiei kiba dei ban ïa pyrkhat rangbah. Kaba nga shem bunsien ka long ba haba don kano kano ka jingeh lane ka jingdkoh ha ka synshar khadar ne ka rukom trei kam ka sorkar ki rangbah bunsien ki ong, “Ngin rah noh ïa kane ka mat sha ki seng bhalang.” Kane ka mut ba ki rangbah kiba lah san ka jingmut jingpyrkhat ki leit tynrong ïa ki jingeh ha ki seng bhalang ïa kiba bun na ki la ïalam da ki samla. Toi ki rangbah ki dei ban ïalum ïalang para maki ban ïa thir ïa ki jingeh jingshon bad leit rah dorkhas hakhmat ka sorkar ne kano kano la lympung synshar kum ka District Council lane ki Dorbar Shnong.
Dang ha kine ki khyndiat sngi ba la leit ki don katto katne ki kmie ki kpa kiba lah sngew sohsat bha ban leit ïeng laiñ hakhmat ka phalor jong ka PGT Kolej naduh shiteng miet ba ïoh duh noh ka admission form ban ïoh jaka pule hangto. Ha ka jingshisha ki kmie ki kpa bad ki samla pule kiba ïeng laiñ hangto ki lah dei ban leit ïatylli lang bad leit ïakynduh ïa u Minister ka toh ka pule (Education MInister) ban pyntip ïa u kaei kaba jia khnang ba u lah ban leh ei ei kaba don ha ka bor jong u. Hynrei em, ngi kloi ban leit aiti ïa ka bor ba la pynkhamti hangi da ki kyndon ka synshar paidbah (democracy) ha kiwei pat ki seng. Ka nongrim kaba kita ki seng ki ïeng ka long ba ki ieid ri. Imat kiwei pat ki nongshnong shnong kim ieid ri satia ne ki long ki nongshun ri namar ba kim mih pyni khmat ïalade ha ki jingïalang paidbah kiba har rukom.
Lada mangi kum ki nongshong shnong ha ka ri laitluid ngi shim khia ïa ka kamram jongngi lehse yn ym da donkam than kita ki seng har rukom kiba ïoh lad pat ban lum pisa na ki nongkhaïi bapher bapher jan man la u bnai. Mynta lada ki jhur ki jhep, ki soh ki pai, u khaw u dai, ka shini, slasha wat ki jaiñ ki nep ruh ki kiew dor ka daw ka long namar ba ki nongdie lang ki hap ban siew ïa ki seng bapher bapher. Kita ki seng pat ki sngewdei ban lum pisa namar ba ki shimti ïa ki jingeh jong ngi kiba ngi la tynrong ha ki.
Ban ieid ri, ieid jaitbynriew ngi hap pyni da ki kam, ym tang da ki jingbyrngem byrsit ïa ki briew kynthup ïa ki samla kynthei bad longkmie bad da ka jingpyndonkam da ki ktien sih kiba pynhiardor ïa ka longrynieng lajong. Kaba sngewlyngoh pat ka long ba ha kajuh ka por ngi ki Khasi ngi kam ruh ïalade ba ngi dei kiba tip briew tip Blei. Ngi kam ba ngi tip kur tip kha, hynrei ki kam jongngi kim kdew satia ïa kata la tip briew tip Blei. U lane ka briew ba tip briew tip Blei ki leit trei hok ïa la ka kam ka jam; kim ju kner ka kti ban shim ïa ka pisa kaba ki khlem kamai da ka umsyep, namar ki longshuwa jongngi ki lah maham lypa ba kito kiba shu kwah ïa ka pisa ïohei khlem da sei la ka umsyep kin ym roi, ym par bad kato ka pisa kaba ïohei khlem da trei shitom kan sa khyrwait kylla ïangi bad ngim shem bha lano lano ruh. Hynrei mynta mano ba pyrkhat shuh ïa kita ki jingsneng jingkraw jong ki longshuwa manshuwa?
Kita kiba ieid ri shisha kim donkam ban da pynsngew lane put turoi ïa ki kam jong ki. Kita ki kam ki paw shabar bad dei na ka daw jong kita kiba duriap hok ba kane ka jylla ka dang ïaid haduh mynta mynne. Hynrei lada shu shaniah tang ha kiba put turoi ieid ri te kane ka jylla ka lah ran dien. Wat mynta ruh ngim lah satia ban ïaid shakhmat ha ka khaïi-pateng, ne ha ka pule puthi. Kiba duk ba rangli ki lah nang bun namar ba ka spah ka phew kaba dei ban pyndonkam ha kaban pynkyrsoi ïa ka ïoh ka kot jong ka jylla lah shu pynjah klep noh da kita ki nongsynshar kiba ngi jied man la ka shisien san snem. Shuwa ka elekshon te ngi lah ïa tim ïa ñiew ïa kita ki politishan. Ngi la kdew lut ïa ki jingduna jong ki ha ka synshar khadar bad ka jingbamsap kaba lah palat liam, hynrei mynta pat ngi lah klet lut ïa kita baroh. Don bun na ngi kiba thep vote ïa kiba lah pynkham pisa ïangi. Hynrei nalor ba lah leh ïa kita kiei kiei kiba pyrshah ïa ki kyndon ka ri synshar paidbah, nalor ba ngi dang nud pat ban pyrta shla ba ngi ieid ri. Teng teng lah sngew jlep wat ban sngap ruh.
Haba ieid ri pyni da ki kam. Trei minot bad bylla hok. Kiba leit skul to kin pule bad duriap hok ïa ki kot khnang ban poi shakhmat ym ban shu pass salit. Kiba trei kam sorkar to kin ïarap lem ïa kiba duk ba rangli kiba wan sha ki ophis jong ka Block. Ai jingtip lem ïa ki shaphang ki skim sorkar kiba bun kiba kim tip bad namarkata ki duh jingmyntoi. Ki nongkyndong bad ki nongrep ki donkam ïa ki ophisar kiba trei ha ka tnad ka rep ka riang ban wan ai jingtip bad jinghikai ïa ki kumno ba kin kham ïoh jingmyntoi na ka rep bad khamtam na kaba thung ïa ki diengsoh namar ngi shem ba u sohniamtra lei lei u lah dor bha. Don ki shnong kiba kine ki dieng sohniamtra ki iap tram. Ka dei ka kamram ki nongtrei ha ka tnad rep (Agriculture &Horticulture) ba kin leit sha ki lum ki pynthor jong ki nongrep, ym ban ap ba ki nongrep kin wan sha ki ophis. Kata keiñ ka dei ka trei hok bad ka jingieid jaitbynriew. Haba ki shakri sorkar ki ïoh ka jingsiew kaba biang man la u bnai, balei pat ba kim pyndep hok ïa ki kamram jongki?
Ha ka jingshisha kane ka jaidbynbriew ka donkam ban ïathir halor kiba bun ki mat ki phang ban tei ïa ka jingmut jingpyrkhat jong kiba dang heh dang san. Hynrei sngewsih ba imat wat ki Balang bapher bapher ruh ki lah tlot bha ban sneng ban kraw ïa la ki jong ki nongbud. Kumba ong mano re, ki jingïaseng man la ka taiew ki dei tang ban ïoh lum ïa ka jingkhrong. Hadien kata, kaei kaba jia ïa kato ka pisa ym don ba tip shuh. Ki jingjia ka ka ïingmane Presbyterian Mawkhar ha kaba jah ka pisa haduh 4 klur tam ka kdew shai ïa ka jinghiar dor jongngi ha ki liang baroh. Lada wat ïa ka pisa kaba la mang na ka bynta ki rangli ki juki bad ban pynïaid ïa ki skul sha nongkyndong ruh ka pynjah klep noh, te ngi ïa ong aiu shuh keiñ.
ïa mynta bha ban ïa pyrkhat sani bha la kata ka jingpyrta ieid jaidbynriew ka long kaba lah paw shisha ha ki kam ne kaba tang na shyntur.
