Hato don kiba ïoh ring Video ïa ka kali pulit ba tynrah ïa u samla haduh ban da iap?

Shillong, Naiwieng 18 : U Myntri ka tnad Tourism ka Sorkar Jylla, Bah Paul Lyngdoh ha ka sngi Nyngkong u la kyntait halor ki jingkynthoh kiba bun haba ïadei bad ka jingkhlad noh u samla ba shah tynrah kali ha lynti ban leit sha ka tamasa Cherry Blossom ha Ri Bhoi, ba ka dei kata ka jingleh baheh ki kali VIP. Hato don kiba ïoh ring video ïa kata ka kali pulit ba tynrah ïa u samla haduh ban da iap lada don ki la dei ban mih shakhmat ,ong u bah Paul.
Kane ka jingkren jong u Myntri kadei hadien ba ka la mih ka jingdawa na baroh ki liang ba dei ban pynkut noh ïa ka jingleh VIP khamtam hadien ka jingjia ha katei ka sngi kaba la mih ka jingkynnoh ba ka daw ka jingkhlad u samla ka dei na ka jingtynrah ka kali pahara ïa ka bike ba u shong katba u dang don ha lynti ban leit sha ka tamasa Cherry Blossom.
Haba kren bad ki lad pathai khubor, u Bah Paul u la ong ba ha katei ka sngi u la mih ryngkat bad u Myntri Rangbah ka jylla u Conrad K Sangma bad bud nadien ka kali jong u. U la ïathuh ruh ba ki la don bun bha ki kali VIP bad ka kali jong u ka bud nadien ka kali jong u Myntri Rangbah bad ter ter ki dang don shuh bun ki kali kynthup ïa ki kali pulit kiba bud nadien.
“Ka jingïaid ki kali ka long kaba suki bha namar ka dheng kali ka long kaba jur bha bad ym lah ban ïanujor bad ki snem kiba la dep. Ngi la sahkut kumba saw ne san sien ha lynti kat haduh ban da poi sha ka jaka. “Kumta kane kam don jingïadei ei ei bad kata ka jingleh VIP,” u la ong.
Nalorkata, u la ïathuh ba tang na ka daw ka jingjur palat ka dheng kali kim shym la lah shuh ban poi ha ka por kaba biang sha katei ka tamasa Cherry Blossom. U la ong ruh haba ki kali ki ïaid suki suki kan ym lah ban long ba kino kino ki kali pulit kin ïoh ban pynher bad bakla haduh ban da tynrah ïano ïano.
Ha kajuh ka por na ka liang ki samla NPP hapoh ka lama jong ka National People’ Youth Front (NPYF)ki la dawa na ka sorkar ba ka dei ban pynlong da ka jingtohkit kaba bniah halor katei ka jingjia haduh ba utei u samla un duh noh ia la ka jingim.
Na ka liang u President ka NPYF, Bah Kitborlang Nongrem da kaba phah ka jingsngewlem sha ki bahaiing ha sem jong utei u samla, u la ong, “Ngi buh ka jingdawa sha ka sorkar ba dei ban pynshitom ia ki briew kiba donkti ha kane ka jingjia bad ngeit skhem ba ka sorkar kan shim jingtohkit bad lada lap iano iano ba donkti dei ban ngat katkum ki kyndon jongka aiñ.”