Hato! Don jingma ïa ki MDC Candidate Prah na ki MLA Constituency ba mihkhmat u Prah?

Katba nangjan ka MDC Election,katta nang shongshit bad nangkylla ka jingmut jingpyrkhat jong ki paidbah.Ki paidbah ki la sngap bha ia ka jingkren jong ki nongialam ki party bapher bapher bad ka sur ki nongkyrshan na man la ki constituency.

Ha ka por MP Election,ym long iakren shuh ia ka lyer langthari jong u Prah.Ka jingkhmih lynti ki nongialam Prah mynta ka long,ba, kajuh ka lyer(waves) kan sar naphang lin man la ki MDC constituency ha kylleng ka ri Khasi-Jaintia. Hynrei, imat, kane kam lah shuh satia ban  jia  ha kane ka samoi MDC Election.Imat,ka lyer ba beh ha ka aiom pyrem,ka iapher na ka lyer ba beh ha ka por  lyiur, por synrai bad por tlang bad kumta ter ter.

Ka jingjop kput ka party Prah ha ka MP Election na Shillong Parliamentary Constituency ka la pynlong ia ki nongialam jong katei ka party ba kin sngewsarong, sngew khyllew,sngew meng bad ban nym khein briew shuh iano iano ruh.La i kumba ka dei pynban ka Very Proud People(VPP) lane kata ka Very Powerful Party(VPP).Ka jingsngew stad hanga mei,ka jing act tip lut nanglut bad stad lut jongki,la kum kita ki “I Specialists”.

La i kumba,lada kren kiwei ia ki ym long,hynrei lada kren maki pat,ki kren katba mon la kum kiwei ki dei tang kum ki niut ki nier,ki puit ki khniang.Ki act la kumba ym don shuh kiba kham stad bad kham palat ka jingshemphang jongki( more supreme) ia baroh kiba stad ha kane ka pyrthei stad mynta.

La i kum ka kynhun Voice of Powerful People(VPP) ne ka Voice of Proud People(VPP) pynban.Ka jingmaham ka ktien ki riewstad kalong ba ka jingsarong ka wan hashwa ka jingjot(pride goes before destruction).

Ka jingsngew stad palat ruh ka pynisih ia ki riew shisha bad riewpyrkhat pyrdain(like minded people)

Ha ka jingshisha,shisien ba la ioh ia ka jingieit bad jingshaniah na ki paidbah,dei ban don shuh shuh ka  jingsngewrit bad ka akor ka burom namar dei ka jinglehrit ne sngewrit kynthop ha ryngkat  ka akor ka burom u briew kaba thaw pyrthei bad saindur ia ka longbriew man u briew wat haduh ka synshar khadar ruh.   Ngi iohi lyngba ki lad pathai khubor(social media) ba ki constituency Prah na Mawlai ka don jingma ha ki kyrtong Independent.Ka Headquater u Prah na Nongkrem ruh,lah i triem bad i shyrkhei shibun ka jingialeh bad u kyrtong shi met hi.

Na ka constituency Prah jong ka Mawryngkneng/Sohryngkham ruh ka bym i thikna shuh.Yn nai iakren ia ka constituency Prah na North Shillong( Jaiaw bad Mawkhar) kaba ka jingia pyni nia ka jur bha,mano ba dei bad ba lait kaba la pynkulmar jingmut(confused) ia ki paidbah ba lui lui bapli (innocent people).

Tangba,lada jia ba ki Prah ki rem shisha na kitei ki saw(4) tylli ki constituency ba ki jop ha ka election  MLA  2023,kata,ki la duh jingshaniah na ki paidbah,sa tang ha ki constituency thymmai ki lah ban jop namar “Tang kiba lah phong ia ka juti,ki sngewthuh ba thar u prek”.

Lada u Prah um ioh majority shisha ban thaw ia ka EC ha KHADC ne JHADC,ki la dei ban pyrkhat janai bha(post morten) ne wad bha ia ki daw bah daw san(re-retrospective ) khnang ba kin ioh biang ka jingieit bad ka jingshaniah na ki paidbah kylleng ka ri Khasi-Jaintia jongngi ha ka MLA Election kaban long ha u snem 2028.