Nongstoiñ, Rymphang 04: Ka jingkieng phod Thre kaba pynïasoh ïa ka Upper New Nongstoiñ bad ka shong Tiehsaw ka dei kaba la sdang ban shna naduh u snem 2003 ha ka por ba ka Balang Presbyterian New Nongstoiñ ka pdiang ïa ka jingïaseng Assembly jong ka KJP Synod hynrei u kontraktor uba pyntrei ïa katei ka jingkieng um shym la lah ban pyndep bad ka la shu sah khongreng la palat arphewsan snem.
Ka jingsahkut jong katei ka jingkieng ka la pynlong ïa ki paidbah nongshong shnong, ki sengbhalang bad ki riewrangbah jong ka Nongstoiñ bad ki shnong ba marjan ba kin dawa ïa ka sorkar na ka por sha ka por ba kan mang pisa biang na ka bynta ban shna pyndep noh. Kumta ha u snem ba ladep na ka liang ka sorkar kam banse ban shimkhia ha kaba ka la mang pisa na ka bynta ban pyntrei ïa katei ka jingkieng. Kumta ha kine ki khyndiat sngi ba ladep u nongthohkhubor ula hiar sha katei ka jaka ban leit peit bad la lap ba ka jingpyntrei ïakatei ka jingkieng ka la sdang bad ka la ïaid shait shait.
Ha katei ka sngi la ïoh ban ïakren bad uwei na ki nongtrei uba don ha katei ka jaka ha kaba u la ong ba ïa ka jingpyntrei la sdang naduh u bnai ba Kyllalyngkot hynrei na ka daw jong ka jingthud jong ka mashin ban khleh dewbilat ka jingtrei ka la suki noh hynrei hadien ba ladep ban phah moramot ïakatei ka mashin yn sa sdang biang bad ula ong ruh ba mynta ki dang ïalaleh ban tan ïa ka um na ka thliew ba ladep tih ban tei païa. Haba kylli pat katno kan shim por ban pyndep ïakatei ka jingkieng, utei u nongtrei u la ong ba ka shong ha ka jingdon jong ki nongtrei ba u kontraktor u buh bad lada ki biang ki nongtrei la khmihlynti ba hapoh une u snem yn lah ban pyndep ïa katei ka jingkieng. Katei ka jingkieng kan long ka jingmyntoi kaba khraw shibun eh ïa ki paidbah jong ka shnong Tiehsaw, Porsohsat, Nongritong, Sohpian bad kiwei kiwei.
