Hapoh u Naiwieng yn pyndep ka sorkar ban pynkynriah ïa ki nong shong dukan die madan na Khyndailad

Shillong, Risaw 8 : U Myntri ka tnad jngohkai u Bah Paul Lyngdoh ha ka sngi Ba-ar, ula pynbna ba ka Sorkar ka la pynkhreh ban pyndep noh ïa ka jingpynkynriah ïa ki nong shong dukan die madan na Khyndailad hapoh u Naiwieng mynta u snem.
Ula pyntip ruh ba ka jingpynkynriah ïa ki nongshong dukan die madan ha kiwei kiwei ki jaka ha Nongbah Shillong kum ka Laitumkhrah bad kiwei kiwei, yn sa pynmih jingpynbna shen.
“Haba phai sha ka jingpynkynriah ïa ki nongdie madan, ka jingpynleit jingmut ba kongsan jong ngi ka long ba pynpoi ïa kane ka kam sha kaba kut” ong u Bah Paul haba kdew ba ki don ki jaka ba kyrpang ha ki jaka khaïi la buh beit thik tang ïa ki nongdie madan.
“Mynta ngin sa pynbna noh ïa ki jaka shong dukan madan (vending zone) bad ha ka bynta ba nyngkong, ka dei ka Khyndailad bad ka bynta kaba ar ka dei ka Laitumkhrah, kin dei shibynta na kane ka kam” ula bynrap.
U Bah Paul u pyntip ruh ba ka Sorkar ka don jingthmu ban ai da ki permit ïa ki nongshong dukan die madan bad ban sdang ruh ïa ka kam ha kaban pynlong ia ka Khyndailad kum ka jaka ïaid kjat u paidbah hadien bala dep pynkynriah ïa baroh ki nongdie madan.
Haba ïadei bad ka jaka bala ithuh ban shong dukan ki nongdie madan ha Khyndailad, u Bah Paul ula ong “ïa mynta, ki don lai tylli ki jaka bala ithuh bad ngi dei ban lah ha ka ban ai jaka ia baroh kito kiba shong die madan kiba pyndep ïa baroh ki jingdonkam bala buh da ka Tnad Urban Affairs”.
Haba kylli, u Myntri ula ong “Kin don hapdeng 200 haduh 250 ngut ki nongshong die madan ki ban shah pynkynriah”.
Halor ka jingdon ki nongdie madan ba khlem pat register, u Bah Paul ula pynshai “Ka jingpynrung kyrteng kala ïaid mynta la shisnem. Ki don ki kyndon bala buh shai bha da ka Sorkar bad kito kiba pyndep ïa kine ki kyndon, kin don ha ka thup bala ithuh kum ki nongdie madan bad tang kine kin ïoh ïa ka jingiïarap na ka Sorkar”.
Lah ban kdew ba ka Sorkar lyngba ka jingïatreilang hapdeng ka Tnad Urban Affairs bad Tourism, ka don jingthmu ban pynkylla ïa ka Khyndailad kum ka jaka ïaid kjat u paidbah bad ka jaka ïaput iatem (music hub). ïa kane la leh da ka jingthmu ban khring ïa ki nongshangkai pyrthei kiba wan sha Shillong, kaba la bna nam kum ka Nongbah ka put ka tem ha Ri India.