Shillong, Nailur 04 : U Symbud Myntri Rangbah ka Jylla, Bah Prestone Tynsong ha ka sngi Balang u la ïathuh ba la kumno kumno ïa ka elekshon MDC ha KHADC bad JHADC yn hap ban pynlong noh ha shwa ka 05tarik Lber, 2025.
Ïa kane u la kren da kaba pyntip ba ïa ka samoi treikam jong kine ki ar tylli ki Autonomous District Council la pynjlan noh sa 6 bnai da kaba ïaid katkum ka aiñ.
Shuh shuh u ïathuh ruh ba kane ka jingpynjlan biang kadei namar ba ka jingpynjlan kaba 6 bnai kan kut noh ha kane ka 5tarik mynta u bnai.
“Hadien ba ngi la ïoh ïa ka report na baroh ar tylli ki district council haba ïadei bad ka jingpynbeit thymmai ïa ki katto katne ki constituency jong ki kaba ngi ong ka Delimitation Committee. Kumta hadien ba baroh ar tylli (KHADC bad JHADC) ki la dep ban mynjur badphah sha ka sorkar ban pynpoi sha u Lat. Ha kata ka nongrim ka pynlong ïa ka sorkar jylla katkum ki kyndon jong ka Khyrnit ba Hynriew ba kam banse shuh ban pynjlan biang ïa kane ka samoi kaba dei 6 bnai naba katkum ki kyndon ka ong ba lah ban pynjlan ym palat ïa ka shisnem ym palat ïa ka 12 bnai,” u la ong.
U la ïathuh ruh ba ka jingpynkhreh ïa ka elekshon ha District Counci mynta ka la ïaid shakhmat bad kane ka jingpynjlan biang kadei ban lah pyndep noh ïa ka jingpynbeit thymmai ïa ki constituency bad kumjuh ïa ki electoral roll jong ki MDC constituency.
