Shillong, ïaïong, 08: Ka Global Alliance for Vaccines and Immunisation kaba dei ka kynhun kaba ju peit bad khmih ban pynïoh ïa ka injek tika na ka bynta ki khunlung ha ki ri kiba kham duna ka ïoh ka kot ka la pynlong ïa ka jingïathir ïatai ha nongbah Shillong.
Ka GAVI ka dei ka kynhun kaba ju bei jingïarap ban pynpoi ïa ki tika ha ki ri kiba kham duna ha ka ïoh ka kot ha kylleng ka pyrthei.
Ïa kane ka jingïathir nia kaba la long ha Shillong Club, Shillong ïa kaba la pynlong da ka National Health Mission, Meghalaya ha ryngkat ka jingïatreilang bad ka UNDP Meghalaya, ka UNICEF, ka WHO, ka JSI bad ka JHPIEGO la ïashim bynta da ki nongmihkhmat na ki saw tylli ki jylla kiba kynthup ïa ka jylla Meghalaya, ka jylla Mizoram, ka jylla Arunachal Pradesh bad ka jylla Nagaland. La plie paidbah ïa kane ka jingïalang da u Mission Director ka National Health Mission, Meghalaya u Ram Singh.
Ha kane ka jingïalang la ïathir sani bha halor ki thong kiba ka GAVI Alliance ka la pun jingkieng ban pynpoi ïa ki injek tika sha ki ri bapher bapher bad kumjuh ha ki jylla jong kane ka thaiñ Shatei Lammihngi ha kaba bun na ki kmie ki kpa kim pat leit rah satia ïa la ki khun ki kti ban pynïoh ïa ka injek tika na ka bynta ban ïada na ki jingpang balaiphewjait.
Kane ka jingïathir nia ka la ïarap ruh ïa ki kynhun bapher bapher ban bishar bad ban tih bniah ïa ki jingeh kiba mih hakhmat na ka bynta ban pynpoi ïa ka injek tika.
Ka thong jong ka GAVI ha kane ka kynti ka long ban wad ïa ki shnong bapher bapher kiba don ha kine ki saw tylli ki jylla ban pynïoh ïa ka injek tika sha ki khunlung da ka jingïatreilang bad ki shnong ki thaw bad ki kynhun trei mon sngewbha.
Kane ka jingïalang ka la buh ruh hakhmat ïa ka thong ban pynïoh ïa ka injek tika sha ki khunlung bad ïa ki khynnah rit kiba sah ha ki shnong ki thaw bym pat ju ïoh wat tang shisien ruh ka injek tika.
Ka GAVI kan jingkyrshan ïa kine ki jylkla ba kin kynjoh sha kane ka thong hapoh san snem, kata, naduh u snem 2022 haduh u snem 2026.
