Nongstoiñ, Jylliew 20: Ka ophis jong ka District Tuberculosis Officer, West Khasi Hills District Nongstoiñ, mynta ka sngi ka la sam ia ki song jingbam sha ki 8 ngut ki nongpang TB ha Mairang Community Health Centre (CHC) kaba hap hapoh Eastern West Khasi Hills District Mairang, kum shibynta ban iarap ia ki ha ki jingdonkam jong ki ia jingbam kiba tei khnang ba kin ioh ia ka met kaba koit kaba khiah.
Ia kane ka jingsam ia ki jingbam ba la pynlong da ka Pradhan Mantri TB Mukt Bharat Abhiyaan bad I Dr. F. Marbaniang, MO Ayush Mairang CHC I la long I kongsan ha kane ka programme.
Haba kren ha kane ka sngi I Dr F. Marbaniang, I la iathuh ba kane ka Pradhan Mantri TB- Mukh Bharat Abhiyan, ba la pyllait da u President jong ka Ri India ha ka 9 tarik Nailur 2022, ka thmu ban wanrah ia ka jingiatreilang bad ban shim ia ki lad jingsumar ban ioh jingpynkoit na kane ka jingpang.
I la iathuh ruh ba ka Sorkar India ka la pyrshang katba lah ban pynkut noh ia ka jingpang TB ha kaba kut jong u snem 2025 ha ka ri India baroh kawei. Namarkata I la kyntu ia ki nongpang TB ba kin ai ka jingiatreilang, ban shim ia ki lad jingsumar ban ioh jingpynkoit na kane ka jingpang. Ha kajuh ka por, I la pyntip ia ka thong ba ka Sorkar India ba ka la buh ban pynkut noh ia ka jingpang TB ha kaba kut jong u snem 2025.
Kiwei pat ki nongkren ha kane ka sngi ki kynthup ia I Kong. B.B. Nongrum, State Nodal Officer PMTBMBA, Meghalaya, I Bah G. Lyngdoh, District Programme Co-ordinator, NTEP West Khasi Hills, I Kong. Ibaiarilin Tham, PIRAMAL Foundation bad kiwei kiwei de.
