Nongstoiñ, Nailar 8: Ka jingpynbha bad siang rong ïa ka surok kaba la pyntrei lyngba ka Pradhan Mantri Gramsadak Yojana kaba 16 kilomitar naduh Tynghor haduh Athiabari, ka la ïaid shaid shaid naduh kine ki bnai ba la dep ha kaba la sdang ban siang maw naduh Aradonga.
Kum ban pynkynmaw ba ïa katei ka surok la khot tender haduh lai sien lai wat, hynrei na ka daw jong ka jingrit jong ka jingmang pisa ym don ba thep satia. Pynban kham hadien pat uwei u kontraktor u la shimti ban pyntrei ïa katei ka surok bad ha u bnai Nohprah jong u snem ba la dep, la sdang biang ïa ka jingtrei bad mynta ka la ïaid shait shait ha kaba ki paidbah nongshong shnong katei ka thaiñ, ki don ka jingkyrmen ba lada u kontraktor u shimkhia, hapoh une u snem yn lah ban pyndep ïa katei ka surok namar kam da jngai than na Tynghor shaduh Athiabari.
Ki nongïalam ka Synjuk ki rangbah shnong ka thaiñ Muliang ba kynthup ïa u Bah B.Nonglang Bah S.Mawlieh bad kiwei kiwei, haba ïakren bad u nongthoh khubor mynta ka sngi ki la ong ba na ka liang ka synjuk kam lah khlem da ai khublei ïa utei u Kontraktor uba la pyntrei ïa katei ka surok, na ka bynta ka jingmyntoi jong ki paidbah ka thaiñ.
Ha kajuh ka por ki la ong ba wat la ka jingtrei ka dang shu sdang ruh ki don ka jingkyrmen ba hapoh u bnai Nohprah jong une u snem, u Kontraktor u la lah ban pyndep lut ban siang maw ?a ki bynta ba dang sah jong katei ka surok.
Kitei ki rangbah ki la pynpaw ruh ?a ka jingsngewnguh ruh ïa u Bah K.P.Pangñiang MLA barim ka thaiñ, uba la trei shitom ha ka por ba u dang long kum u Nongmihkhmat, da kaba u la leit dalade haduh Delhi ban pynbiang ïa ki kot ki sla, na ka bynta ban pynïoh jingïarap ha ka ban siang rong ym tang ?a katei ka surok Langja-Mawthawkrah bad na Mawthawkrah haduh Nongkhlaiñ, kaba pynïasoh bad katei ka surok Tynghor-Athiabari, kaba la pyntrei da katei ka juh ka skhim PMGSY.
Ki la ong ruh ba lyngba ka jingtrei shitom jong u la ïoh ban siang rong ruh ïa ka surok kaba shi kilomitar na Ktiehthawiar sha Langpih, ïa kaba la pyndep naduh u bnai Nailar jong u snem ba la dep. Ki la ong ruh ba ha ki snem ba la leit noh, ki paidbah katei ka thaiñ ki la mad shibun ki jingeh ka ha ka leit ka wan, ka kit ka bah khamtam eh ha kaba kit ïa kiba pang ba shitom ban leit phah sumar, namar ka jingsniew palat jong katei ka surok. Hynrei naduh ba la pyndep ïa katei ka surok, leit ka wan ka kit ka bah ka la suk bad kam don jingwit ei ei shuh.
Nalorkata kitei ki rangbah ki la ong ruh ba ki don da ki phew tylli ki shnong ha katei ka thaiñ, ki dei kiba hap ha ka Mawshynrut C&RD Block. Naduh ba ka Mawshynrut ka la ïoh ïa ka Civil Sub Division, ïa baroh ki jingdonkam khamtam eh ïa ki kam kiba ïadei bad ki ophis sorkar kum ka jingpyntrei ïa ka skhim shispah sngi bad kiwei kiwei ki la hap ban leit sha Riangdo.
Ki la ong ruh ba namar ba ka don tang kawei ka surok haduh Rwiang kaba jngai kumba laiphew san kilomitar, kaba ki hap ban ïaid bad haduh ban da poi ha Riangdo ha ka jingjngai kaba ym duna ïa ka sanphew san kilomitar. Kumta ki la ong ba ka la I donkam haduh katta katta ba kan don noh ka surok na Umthlong sha Mawsaw haduh Mawsyrpat, namar ka la don lypa ka surok rong na Mawsyrpat sha Seiñduli, khnang ban pynsuk ïa ki paidbah ha ka leit ka wan.