Nongstoiñ, Naitung, 14: Ha kine ki taïew ba la dep ki nongrep sying ha man la ki shnong hapoh West Khasi Hills ki la sdang ban phuhmat bha, namar ba ka dor ïew ka la kiew haduh hynriew hajar tyngka shimon ong u bah N.Syiemlieh uwei na ki nongrep sying na ka shnong Nonglang.
U bah Syiemlieh u la ong ba katei ka jingiew dor ka la pynkmen shibun ïa ki nongrep hynrei tang hadien shitaïew ka dor ka la hiar sha ka san hajar tyngka shimon bad ha kine ki sngi ka la hiar pat sha ka sawhajar sanspah tyngka shimon. Haba kylli pat katno mon u ju rep sying man la u snem u bah Syiemlieh u la ong ba mynta u snem u rep tang arphew mon tam namar ba um don ha ka met ka bym shait byn khlaiñ bha.
Haba kylli pat ba lada u thung shimon katno u ïoh ynda la dei ka por ban khlong , u la ong ba ha ki snem ba mynshuwa te lada thung shimon lada ïoh duna eh ruh lai mon u ju ïoh, hynrei mynta la saw snem ei ei sying um bha shuh ban lada thung shi mon don ki jaka ba wat shi mon ruh ym ïoh shuh, namar bun kiba pyut bad ki bym pyut ruh ki rit namar ba hadien ba la dep thung ynda u la speh bad mih lai saw sla u stem noh bad ki don ki jaka ba haduh ban da dei ka por khlong tang marshiteng ïa kaba la thung ruh ym don shuh namar ki la pyut bad ïap tram lut.
Ha kaba ïadei bad ka dor ka mur jong u sying, u bah Syiemlieh u la ong ba ki nongrep ki lyngngoh bha namar ka dor jong u sying kam ju neh wat tang shibnai ruh. Don ki snem ba ym don ïew satia wat ban die ruh bad lada ki nongrep ki thung ruh ki hap ban shu bret kai namar ïa u sying ki mrad ruh kim bam, u briew ruh u pyndonkam tang ban ber malu mala haba shet jyntah. Nalor kata u la ong ba man la ka por ki nongrep ki ju ud sha ka sorkar bad ki ju kyrpad ba kan phah ïa ki stad wad bniah ba kin ïarap lem ban pynshai balei ba u sying u ïap stem khlem pat dei por bad u pyut. Hynrei haduh mynta ka sorkar kam shm pat la phah ïa ki riew shemphang bad ki stad wad bniah ba kin pynshai sha ki nongrep lane ba kin batai kumno ban ïada na katei ka jingïap stem.
Khatduh eh u la ong ba ki nongrep ki la pyrshang ban trei shitom kumno ban thaw ki buit ki lad ban ïada na ka jingïap stem bad ka jingpyut, hynrei kim lah satia namar ba ka dei ka kam kaba ki la im sngi ha ka rep ka riang, kim nang shuh ban trei da kiwei pat ki jait kam bad lada ka sorkar kam ïarap lem ki nongrep kin shu sah ha ka um dum baroh shirta.
