Hapoh shibnai yn maramot ïa ka jingkieng na Lad Umsaw ka ban mih sha Mawmaram, pyntip u Bah Prestone

By Mawphor Editor On Apr 29, 2025

Shillong, Ïaïong 28: U Symbud Myntri Rangbah ka jylla u Bah Prestone Tynsong uba khmih ruh ïa ka tnat PWD u la pynthikna ban maramot noh ïa ka jingkieng kaba don ha Mawlyngdep kaba la pynïasoh bad ka Lad Umsaw sha Mawmaram bad kane ka jingmaramot kan long hi hapoh ka shi bnai.
Ïa kane la pyntip da u president ka Meghalaya Commercial Truck Drivers and Owners Association (MCTOA) u Bah Mosklandar Marngar hadien ka jingïakynduh bad u Bah Tynsong ha ka sngi Nyngkong.
Haba kren sha ki lad pathai khubor u Bah Marngar u la ong ba ka daw ba la pyrkhing ïa ki trok kiba khia 9 ton ban ïaid na Lad Umsaw sha Mawmaram ka dei namar jong ka jingsdang pyut jong kane ka jingkieng bad kumjuh ruh ka jingshna kaba dang ïaid ïa ka surok ka Shillong-Western Bypass.
U Bah Marngar u la ong ba ki trai bad ki nongñiah trok ki la pyntip ïa u Symbud Myntri Rangbah shaphang ki jingeh jong ki ban pynpoi ïa ki tiar sha ki paidbah na ka daw kane ka jingpyrkhing ban ïaid ki trok napoh Lad Umsaw sha Mawmaram.
U la bynrap ba u Symbud Myntri Rangbah u la pynthikna ba ka tnat PWD kan sa shna da ka Subway bad ha kajuh ka por yn maramot ïa ka jingkieng khnang ban ïoh ban shah ïa ki trok ban ïaid.
“U Symbud Myntri Rangbah u la pynthikna ïa ngi ba hapoh ka shibnai yn shna noh ïa ka Subway bad kumjuh ruh ka jingmaramot ïa ka jingkieng ha Mawlyndep khnang ba ki trok kiba kit palat ïa ka 9 ton kin lah ban ïaid na Lad Umsaw sha Mawmaram,” ong u Bah Marngar.
U Bah Marngar u la ong ba ha ka jingïalang, ka MCTOA ka la kyrpad ïa ka sorkar jylla ba kan wad da kawei pat ka lynti ne surok na ka bynta ban ïaid ki trok katba ka tnat PWD ka dang shna ïa ka Subway bad kumjuh katba ka dang maramot ïa ka jingkieng.
“U Symbud Myntri Rangbah u la pyntip ïa ngi ba un sa khot ka jingïalang bad u SP East Khasi Hills, nangta u SP (Traffic) bad ka tnat ka Kit ka Bah (Transport Department) ban wad da kawei ka lynti ba shipor ban shah ïa ki trok ban ïaid lyngba namar ki don da ki spah tylli ki kali kiba ïaid lyngba ka Lad Umsaw sha Mawmaram,” u la ong.