Jowai, Nailar 20: Ka Hynñiewtrep Youths’ Council (HYC) East Jaiñtia Hills District mynta ka sngi 20 u Nailur kaba dei ka sngi pynkut ïa ka jingap bad talasi mynder ri kala ïoh ban pynphai kumba 35 ngut ki briew kiba thmu ban rung shapoh ka jylla khlem da don ki kot ki sla kiba biang.
Na ka liang ka seng kala pynbna ruh ba kan pynkut noh ïa kane ka jingap bad talasi kaba la long ha Ratacherra Infiltration Check Gate naduh ka 14/08/2025 bad pynkut haduh mynta ka sngi.
Katkum ka jingkheiñ, naduh ka sngi sdang (14/08/2025) haduh ka sngi pynkut (20/08/2025), ka seng ka la ïoh ban pynphai haduh 183 ngut kiba la pyrshang ban rung khlem ki kot ki sla kiba shisha.
Ka seng ka ngeit skhem ba ka Infiltration Check Gate kan dang ïai pyrkhing bad peit pyrman bha, khnang ba kino kino kiba mut ban rung shapoh ka jylla jong ngi khlem da ki kot ki sla kiba biang kin nym ïoh lad shuh, pynkut ka kyrwoh na ka seng.
