Hapoh shi taïew aipor ka Truck Association ban weng noh ïa khyrdop khajna
![](https://mawphor.com/wp-content/uploads/2022/05/mawphor-1.jpg)
Shillong, Nailar 19 : Ka Meghalaya Truct Association ka la pynpaw ïa ka jingpyrshah kaba jur halor ka jingmih ka khyrdop lum khajna jong ka KHADC ha Umdihar Ri Bhoi District.
Katkum ka kyrwoh, la ong ba ha ka jingïalang kaba long ha ka 18tarik mynta u bnai ka seng ka la shim ïaka rai ban aipor shi taiew ban weng noh ïa katei ka khyrdop kaba la pynieng da ka KHADC ha ka 14tarik mynta u bnai.
Ka kyrwoh ba la phah da u President, Bah Kynsaikupar Rani, ka ïathuh ruh ba ha katei ka khyrdop ki hap ban siew 200 tyngka kawei ka trok. Kumta la ong ruh ba na ka liang ka Association ka kwah ban tip ïa ka daw ka jinglum ïa katei ka khajna na baroh ki trok kiba ïaid ha katei ka lynti na Assam sha Meghalaya man ka sngi.
“Ka Association ka ai por shi taiew ban khang noh ïa katei ka khyrdop jong ka Council kaba la shu treikam beaiñ,” ong ka kyrwoh.
Katei ka Association ka kynnoh ruh ba ka KHADC ka la shu pyntreikam beain ïa katei ka khyrdop khlem da ïoh jingbit na ka National Highway Authority of India bad ruh na ka sorkar jylla.
Ha kajuh ka por ka Association ha ka kyrwoh ka la ong ruh ba kin sa thoh sha u Chief Secretary bad Deputy Commissioner ka Ri Bhoi District ban phah weng noh ïa katei ka khyrdop mardor ha shwa ba kin leh da kaba kham tyngeh.