Hapoh saw sngi dei ban pynheh noh ïa ka tulop ki nonghikai

Khliehriat Naitung 1: Ka Jaiñtia Students Movement Central Body ba la lam khmat da u President rangbah, u bah Leningstar Rymbai, lyngba u kyrwoh u la ong ba ka seng ka ai por tang hapoh saw sngi, kata hapoh ka 6 tarik mynta u bnai ba ka sorkar MDA ka dei ban pynheh ne kyntiew noh ïa ka tulop jong ki nonghikai kiba hapoh ka shatri jong ka FASTOM bad lada ka sorkar kam lah ban leh ïa kane ka jingdawa, ka seng ka byrngem ban pynlong da ka pakhang shnong ha baroh kawei ka ri lum Jaiñtia kaba kynthup ka East Jaiñtia Hills District bad ka West Jaiñtia Hills District, ïa kane ka rai la shim ha ka jingialang jong ka seng ba la pynlong mynta ka sngi ha Tuber Sohshrieh.
“Ngin khot ïa ka pakhang shnong kaba khat ar kynta ha ka 8 tarik u naitung, kata naduh ka por 5 baje mynstep haduh 5 baje janmiet lada ka sorkar kam sngap ïa ka jingdawa ki nonghikai kiba dawa ïala ka jong ka hok, kane ka long ban pyn pei shkor ïa ka sorkar kaba khlem kyntiew shuh ïa ka tulop jong ki nonghikai mynta la bun-bun tylli ki snem” ong u kyrwoh na ka seng.
Ka seng JSM ka pynpaw ka jingsngew khia kaba khraw na ka bynta ki nonghikai skul adhock kiba hap ban shong ban thiah miet ha surok bah ha sir Shillong ban dawa ïa la ka jong ka hok ban kyntiew ïa ka tulop jong ki.