Hapoh san sngi dawa panmab ka Shillong Press Club bad ka MEPA na u President ka VPP
Shillong, Rymphang 02 : Ka Shillong Press Club (SPC) bad ka Meghalaya Editors’ and Publishers’ Association (MEPA) ki la dawa na u President ka Voice of the People Party (VPP), Bah Ardent Miller Basaiawmoit ba un pan map hapoh san sngi namar halor ka jingkynnoh khlem nongrim ia ki ar tylli ki lad pathai khubor ka jylla ba kynthup ia ka t7 news channel bad Batesi TV bad ong ba kane ka jingleh ka la buh jingma ïa ka jingshngaiñ jong ki nongthoh khubor kiba trei bad ki.
Ha ka kyrwoh ba la pynmih lang hajuh, na ka liang ka SPC bad ka MEPA ki la ong, “(Ngi) pynrem jur ïa ki jingkynthoh ba phi kren ha ka jingïalang paidbah kaba la long ha Nongstoiñ, West Khasi Hills District ha ka 15tarik Kyllalyngkot, 2025. Ha ka jingkren jong phi, phi la kynthoh khlem nongrim ïa ki ar tylli ki lad pathai khubor ba pawkhmat ha Meghalaya – kata ka t7 news channel bad Batesi TV – da kaba buh jingma ïa ka jingshngaiñ jong ki nonglum khubor kiba trei bad ki lad pathai khubor.”
Shuh shuh la bynrap, “Kum ki nongthoh khubor, ngi don ka kamram ban ai khubor ïa ki mat kiba ïadei bad ka jylla bad ki paidbah jong ka, kumta ki jingkynnoh khlem nongrim jong phi ki buh jingma kaba khraw ïa ka jingshngaiñ jong ki nongtrei ha ki lad pathai khubor.”
Ngi dawa ba phin pynshai mardor halor ka jingkren jong phi ha ka jingïalang paidbah namar ba ki khubor ba la pynmih da kine ki lad pathai khubor ki long, katkum ka jingtip jong ngi, kiba shisha bad ki bym don kano kano ka jingthmu ban pynjah burom ne pynjah burom ïa uno uno u briew ne ia ka seng saiñ pyrthei,” ong ka SPC bad ka MEPA.
Nangta la bynrap shuh da kaba ong, “Nalorkata, ngi kwah ba phin panmap na ka liang jong phi kum u President ka VPP na ka bynta ka jingkynnoh khlem nongrim jongphi pyrshah ia ka t7 bad ka Batesi TV. Ia kane ka jingpanmap dei ban pynmih hapoh san sngi naduh ba la ioh ia kane ka shithi. Lada ym lah ban leh kumta, ka SPC bad ka MEPA kin hap ban shim ïa ki sienjam kiba dei pyrshah ïa phi bad ïa ka seng jong phi.
Kaba khatduh eh, ym don ki seng saiñpyrthei, ki sengbhalang, ki kynhun kieng atiar lane ki nongïalam jong kano kano ka kynhun kiba lah ban buh jingkylli ïa ka kam thoh khubor jong ngi katba ngi dang pyndep ïa ka kamram kum ki nonglum khubor,” ki la bynrap shuh shuh.