Shillong, Lber 25: U Member of Parliament (MP) ka Shillong Parliamentary Seat u Dr Ricky AJ Syngkon mynta ka sngi u la pynsngew hapoh ka Parliament ba dei ban weng noh mardor ïa u Vice Chancellor (VC) ka skulbah North Eastern Hills University (NEHU) Shillong.
Ïa kane u MP ka Shillong u la dawa haba wanrah ïa ka Zero Hour Notice hapoh ka Parliament.
Haba kren hapoh ka Parliament, u Dr Ricky u la ong “Mynta kane ka skulbah (NEHU) kaba don ka motto ‘To rise up and build’ ka don hapdeng ka kynrum kynram bad ka daw ka dei namar ka jingbym biang u nongïalam”.
U Dr Ricky u la ong ba naduh ar bnai bala dep, kane ka skulbah kam shym la treikam bha naduh ka jingai jinghikai ïaki samla pule lane ka jingpynlong ïaki jingwad bniah katkum ka thong jong kano kano ka skulbah.
U MP u la kynnoh ba ka jingbymlah jong u VC ba mynta ka la pynlong ïa ki samla pule, ki nonghikai bad ki nongtrei jong ka skulbah ban ïakhih bad ka la pynlong ïa kane ka skulbah ban sahkut khlem da lah ban treikam.
“Nga dawa naki bor khmih khamtam naka tnat Pule Puthi ban shimkhia halor kane bad ban weng mardor ïa u vice chancellor jong kane ka skulbah” la ong u Dr Ricky.
