Hapoh ki lai bnai, palat 6 hajar ngut kiba la wan ha ka jingsumar khmat ei: 35 ngut kiba shitom jur
Mawkyrwat, Jylliew, 30 : Ka Hynñiewtrep Achick National Movement (HANM), South West Khasi Hills District ha ka 29 tarik u Jylliew, 2024 ka la ïoh ban pynkut noh ïa ka jingai jingsumar khmat ei na ka bynta ki paidbah jong ka dong ka thaiñ kiba dei hapoh jong ka Mawkyrwat C&RD Block, South West Khasi Hills District.
Lah ban kdew ba ïa kane ka program la sdang ka naduh ka 15 tarik u Ïaïong, 2024 bad la ïoh ban pynkut ha ka 29 tarik u Jylliew, 2024. Ha kine ki lai bnai na ka liang ka HANM ka la ïoh ban rung ha ki 63 tylli ki shnong bad haduh 6 hajar tam ki paidbah nongwan shim dawai khmat ki la ïoh jingmyntoi lyngba kane ka jingpynlong jong ka HANM ïa ka jingai jingsumar khmat kaba ha ka jingpeit jingkhmih u Dr. Prasun Karmakar na ka Purba Bardhaman Eyes Care Centre bad kumba 35 ngut ki briew ba ka seng ka la hap ban shim jingkitkhlieh ban phah sumar hapoh Nongbah Guwahati.
U bah Kynpham V. Kharlyngdoh kum u kongsan haba kren ha ka jingïalang u la ai ka jingïaroh shi katdei eh ïa ka Hynñiewtrep Achick National Movement (HANM) kaba la shim ïa kane ka synjam ban leh ïa kum kine ki program ban ai jingsumar khmat na ka bynta ki paidbah jong ka dong ka thaiñ. “Nga sngewthuh ba ki khmat ki long kiba kordor ha ka jingim, kumta lada don kum kine ki jait prokram ko ki paidbah kim dei ban pynleh noh ei hynrei ki dei ban shimkabu khnang ba kan long ka jingïarap bad jingmyntoi ïa ki hi”, ong u bah Kynpham.
U la ong ruh ba ha ka jingim jong u briew nalor ba ngi don ïa ka jingim ngi donkam ruh ïa ki lai tylli ki bynta ka kongsan kita ki long, ba ngin nang ban kren, ba ngin nym kyllut bad kawei pat ba ngin ïohi. Ha kajuh ka por u la kren ruh ïa ki jingktah ba lada ki briew ki kyrni ha ka jingdih duma, bam kwai bad bam duma kine ki lah ban long ki daw jong ka jingpyndkoh ïa ka bor ïohi jong ki khmat. Kumta u la kyntu ïa ki paidbah ba wat kheiñ stieng hynrei lada ki sngewthuh ba ki don jingduna ha ki khmat leit mar mar sha ki jaka sumar khnang ba kin ïoh ki lad jingsumar.
Ha kane ka sngi ban pynkut jingsumar khmat ei la pynlong ka jingïalang paidbah ha shnong Mawkyrwat, South West Khasi Hills District ha ka jingïadonlang naduh u bah R.R. Lyngkhoi, Myntri shnong Mawkyrwat, u bah Lambokstar Marweiñ, President jong ka HANM, South West Khasi Hills District, u bah Lamphrang Kharbani, President jong ka HANM, Central Body, lem bad ki paidbah nongshong shnong jong ka shnong Mawkyrwat.