Shillong, Nailur, 21: Ka jingtrei shitom jong ki Pulit ban ïohkem ïa ki dkhot jong ka Legal Rights Observatory (LRO) kiba la wanrah ïa ka jingsngew ïapher jaidbynriew ha ka kyrteng ka niam ka dang ïaid shakhmat.
Ïa kane la pyntip da u Symbud Myntri Rangbah uba peit ïa ka tnat Kam Pohing u Bah Prestone Tynsong haba jubab ïa ka jingkylli ba la wanrah hapoh ka Ingdorbar Thawaiñ ha ka sngi Palei.
“Kane ka kam mynta ka dang don hapdeng ka jingtohkit ban lapdien ïa ki dkhot jong ka LRO bad ban tian bishar ïa ki,” ong u Bah Tynsong.
U la ong, halor ka jingïoh ujor na ka Khasi Students’ Union (KSU) pyrshah ïa ka Twitter Account ba la ai kyrteng LRO halor ka jingjia ha ka 24 tarik, Naitung, ha Mahadev Khola, Shillong la kynnoh ba ka Twitter Account lyngba ka jingthoh ka la teipop ïa ka KSU da kaba kynnoh ba ki dei kiba donkti ban shoh ïa u riewniam, ïa ki riewngeit bad ïa kiwei kiwei bad kynnoh ruh ba ka Balang Presbyterian ka la bsut ïa ka mynsiem isih bad ïa kane ka jingthoh la pynsaphriang ha ka rynsan social media.
Ha kaba ïadei bad kane ki Pulit ki la register case ha Lumdiengjri Police Sation hapoh ka Section 153 (a) 505(2)/500 jong ka Indian Penal Code pyrshah ïa ka twitter account jong ka LRO kaba kynshot ïa ka jingsngew ïapher jaidbynriew ha ka kyrteng ka niam bad teipop ruh ïa ka KSU bad ïa ki niam, u la ong.
