Shillong, Nailur, 14: U Myntri Rangbah ka Jylla u Conrad K. Sangma u la lah ban bujli shuki ha ka Kynhun Myntri ha ki khyndiat sngi ban as wan, la pyntip ka thymmei khubor kaba ïajan bad ka Sorkar.
Kane ka sienjam, la khmihlynti ban pynrung ïa ki dur khmat kiba thymmai bad ban pynhiar shuki ïa ki katto katne ki Myntri Sorkar.
Katkum ka thymmei khubor kaba thikna ha ka Sorkar. kiba bun ki Myntri Sorkar na ka National People’s Party (NPP) bad na ki paralok kiba ïatreilang ki lah ban shah bujli shuki.
Ki Myntri kiba lah ban shah pynhiar shuki ki kynthup ïa u Myntri ka tnat Pule Puthi u Rakkam A Sangma, u Myntri ka tnat Food and Civil Supplies u Bah Comingone Ymbon kiba dei na ka NPP, u Myntri ka tnat Revenue and Disaster u Bah Kyrmen Shylla na ka UDP, u Myntri ka tnat Animal Husbandry & Veterinary u Bah Alexander Laloo Hek na ka BJP bad u Myntri ka tnat Sports & Youth Affairs u Bah Shakliar Warjri na ka HSPDP.
Ka thymmei khubor ka la ïathuh shuh shuh ba u MLA ba la kham rangbah jong ka NPP na Resubelpara u Timothy D Shira u lah ban shah pynrung kum u Myntri ha ka Kynhun Myntri. U Shira dang shen u la shah bthah ba un hiar shuki noh kum u Symbud Lamphang jong ka Iingdorbar Thawaiñ.
Ki durkhmat kiba thymmai kiba lah ban ïohrung ha ka Kynhun Myntri ki long u MLA ka NPP na Jowai u Bah Wailadmiki Shylla, u MLA ka BJP na South Shillong u Bah Sanbor Shullai, u MLA ka UDP na Mairang u Bah Metbah Lyngdoh bad u MLA ka HSPDP na Mawshynrut u Bah Methodius Dkhar.
