Jowai, Jylliew 03: Ka Rotary Club Jowai mynta ka sngi kala ïasnohktilang bad ka ri ka pyrthei baroh kawei ban rakhe burom ïa ka ‘World Environment Day’ kaba hap ha ka 5 tarik Jylliew, da kaba pynlong ïa ka prokram kyrpang ha Khliehtyrshi Secondary School, Thadlaskeiñ Block.
Ha kane ka sngi la wan ban sakhilang ruh da u Dr. Vincent Darlong, Ex-Vice Chancellor Martin Luther Christian University, Shillong kam u kongsan bad u Sri. Vivek Kumar, Co-founder and Director, Saindur Enviro Shillong nalor u Waheh Chnong Khliehtyrshi bad ki dkhot ka Rotary Club, Jowai.
Ha ka jingïalang maitphang ba la pynïaid da u Rtn. Montri Passah MPHF, President Rotary Club Jowai la rwai ïa ka sur National Anthem nangta pynbud ka jingkren jingbatai shaphang ka Environment Day na u Rtn. J.M. Pohsngap, Ex-Conservator of Forest, Govt. of Meghalaya.
U Rtn. J.M.Pohsngap haba kren ha ka jingïadei bad ka World Environment Day ula ïathuh ba ka theme jong une u snem “Only One Earth” ka dei ka mat pdeng ba la dep buh ha ka jingrakhe ïa ka World Environment Day ba long ha u snem 1972 bad ka jingwanrah biang ïa kane ka mat pdeng ka lah ban dei ka jingïohi jngai jong ki riewshemphang ha ka jingïadei bad ka mariang.
U Sri. Vivek Kumar haba ai jingkren ula khring ïa ka jingmut jingpyrkhat ki khynnah da kaba pynlong ka jingïakop thoh Slogan kum shibynta ban pynlong ïa ki khynnah ba kin sngewtrai ha ka jingïadei ban sumar bad pynneh pynsah ia ka mei mariang bad ki sawdong sawkun jongka.
Kiwei kiba ka ai jingkren ha ka jingïadei bad ka World Environment Day kynthup ïa u Kitbok Rymbai, Rangbah Chnong Khliehtyrshi, u Rtn. S.K.Lato, MPHF bad kumjjuh ruh kyrpang na u Rtn. Dr. Vincent Darlong, Ex-Vice Chancellor Martin Luther Christian University, Shillong.
U Dr. Darlong haba batai shaphang ki lad ïada ïa ka mariang, ula ïathuh ba kumno ki khynnah skul ha kiwei ki ri ki shimkhia ban leh ha ka jingim ba manla ka sngi na ka bynta ka mariang bad ki swdong swkun jong ka bad u khot kyrpad ruh ïa ki khynnah skul ka Khliehtyrshi ba kin ïaleh ban pynmlien ha ka jingim ba man ka sngi ba kin long ki briew kiba don ka jingkitkhlieh na ka bynta ka mynta bad ka lawei jong ka mariang.
Ka Rotary Club Jowai ka la buh thong ruh ha kane ka jingrakhe World Environment Day Celebration jong une u snem kala pynbna ba kan thung kumba 200 tylli ki tynrai dieng ryngkat ka jingïatreilang ki khynnah skul bad ka Dorbar Chnong Khliehtyrshi.
